BAUKAU, STLTIMORLESTE.com – Familia uma kain 504 iha Postu Administrativu Baguia, Munisipiu Baukau, hetan apoiu nesesidade bazika husi Ministeriu Solidariedade Sosial no Inkluzaun (MSSI).
Xefe Departamentu Programa MSSI Baukau, Júlio Alexandre António Belo hatete, programa apoiu nesesidade bazika ba komunidade sira iha Postu Baguai, tanba implementa tuir proposta neebe Autoridade Suku antes nee aprezenta ona ba Ministeriu liu husi Servisu Solidariedade Sosial no Inkluzaun Munisipiu Baukau, nunee iha loron 04-05 Setembru nee Ministra Solidariedade Sosial no Inkluzaun rasik direita apoiu nesesidade bazika ba benefisiariu sira iha Baguai.
“Distribuisaun lao diak total hamutuk 504 sira nee husi Suku Lavateri, Alaua Kraik, Hae-Coni, Afaloikai inklui Osso-huna 114,” hatete Júlio ba STL liu husi telefone Sabado (06/09/2025).
Nia sublina, nesesidade bazika neebe fo apoiu ba benefisiariu sira mak hanesan fos kilograma 25 ba kada benefisiariu saka 1, mina tein litru 1 no sasan seluk tan.
Nia fundamenta, apoiu refere laos garantia ba benefisiariu sira nia nesesidade tempu naruk nian, maibe atu auguenta ba moris loron balun nian, tanba familia hirak nee prezisa tebes apoiu.
“Ami mai rekolha dadus hanesan rekezitu kompleta ba relatoriu tula sasan mai halo distribuisaun,” katak Júlio
Xefe Departementu nee akresenta, familia neebe iha Postu Administrativu Baguia sai benefisiariu ba programa refere kompostu husi kondisaun moris Ema ho Difisiensia, Erois Vivos no seluk tan neebe priense kriteiru liu husi rekoilha dadus.
Nia deklara, Ministeriu kontinua iha politika atu apoiu nesesidade bazika iha territoriu nasional neebe posibilidade sei kontinua ba ba faze daruak.
“Balun ita seidauk konsege fo apoiu, maibe sira seluk nee hotu ona planu nee bele trasa fila fali,” katak Júlio
Aliende mos nia dehan, kona-ba familia uma kain 8 neebe iha Suku Tirillolo, Postu Administrativu Baukau Vila neebe dadaun moris kbiit laek tebes, odamatan MSSI Munisipiu Baukau nakloke ba Autoridade Suku hodi submete pedidu.
Jornalista: Tomas Reis
Editora: Domingas Gomes
