AMBENO, STLTIMORLESTE.com – Povu suku tolu iha Oecusse hanesan Suku Bobocase, Suku Kutete no Suku Nipane Bairru Nun Ana sente triste no lamentavel ho Governu Autoridade Rejiaun Administrativa Espesial Oecusse-Ambeno (RAEOA), tanba hafoin estrada kotu total no hetan normalizasaun provizoriu husi kompanhia Toms Building, too ohin loron udan besik monu ba rai, Governu seidauk iha intervensaun hodi normaliza estrada aat iha Sikone Oecusse.
Sentiment Tristeza nee hatoo povu Suku Kutete, Marcos Eko ba STL iha Estrada aat Sikone, Domingu (7/9/2025) katak, Estrada nee iha fulan hirak liu ba hetan estragu total tanba udan boot akontese iha Oecusse, rai monu difikulta tebes movimentu povu husi Bairru Sikone, Suku Bobocase ba komunide suku Kutete, ho bairru Nun Ana, Suku Nipane inklui Postu Unidade Polisia Fronteira (UPF) Fronteira Fatulee ho fronteira Manamas-Indonezia.
“Ami nuudar komunidade Kutete, sente triste teb-tebes, tanba Estrada nee aat fulan hirak ona, maibe sedauk iha intervensaun husi governu Autoridade RAEOA liu-liu Diresaun Rejional Infraestrutura (DRI) iha Ministeriu Obras Publiku Oecusse,” dehan nia.
Nia haktuir tan katak, husi parte tekniku DRI, mai survey ona Estrada aat nee maibe ate agora seidauk tau iha planu implementasaun, neebe foin lalais nee sorte husi kompanhia Toms Building neebe maka mobiliza ninia ekipamentus pezadu husi Oecusse liu husi Estrada nee ba Nun Ana atu halo reabilitasaun no loke Estrada foun ba Hale suku Monemeko ba too sitiu turistiku Leolbatan maka konsege hadia provizoriu maibe oras nee dadaun aat liu tan ona, tanba movimentu transporte publiku kareta estraga tiha ona dalan provizoriu nee, difikulta tebes movimentu kareta no motor, dala barak motor sira maka sai bitima tanba monu, kestaun rai rahun no dalan sae makaas loos ona.
“Ami husu ba governu autoridade atu tau matan ona ba Estrada nee, tanba udan mos besik tau dadaun ona, realidade ohin udan ona, kuandu governu la tau matan maka sei hakotu movimentu ami povu suku tolu nee nia movimentu inklui polisia fronteira neebe halao knaar ba seguransa fronteira,” dehan nia.
Iha oportunidade hanesan, Juvinal Suni hatoo mos sentimentu triste tanba Estrada aat nee, ate agora governu seidauk halo intervensaun hodi hadia.
“Ami husu ba Prezidente Autoridade foun RAEOA, atu tau matan emerjensia dala ida tan baa mi nia Estrada nee, realidade Estrada nee sae makaas, difikulta tebes ona movimentu transporte husi Suku Bobocase ba Kutete no Nun Ana, dadaun nee mos udan besik dadaun ona, husu atu tau matan ba Estrada nee antes udan boot, selae Estrada nee bele aat liu tan,” dehan nia.
Iha tempu hanesan, Xefe Suku Kutete, Jose Antonio Bana iha Kutete dehan, problema Estrada kotu iha Sikone neeba nee, husi parte media foka dala barak ona maibe ate agora governu autoridade RAEOA, seidauk halo intervensaun.
“Ami nuudar Autoridade Lokal suku Kutete, sente triste tanba Estrada nee aat besik ona tinan ida, maibe governu seidauk halo intervensaun, karik kontinua governu la tau matan, sei difikulta ami nia movimentu ba mai hodi haree ami nia povu iha area foho Kutete neebe iha ona Postu Saude, Eskola nomos iha fronteira neeba iha postu UPF Nun Ana inklui mos programa governu mos halao dadaun iha suku rua nee, liu-liu movimentu povu atu buka nia moris liu husi produtu lokal neebe sira iha atu lori ba merkadu buka osan, sustenta nesesidade familia,” dehan nia.
Sentimentu triste mos hatoo husi Xefe Suku Costa, Francisco Colo tanba haree rasik ho matan, kondisaun Estrada nee aat grave tebes antes suku Kutete separa husi ninia suku Costa.
“Ita haree, Estrada nee kontinua aat ba bebeik, maske foin lalais nee kompanhia balun neebe halao serbisu hadia Estrada husi Nun an aba Leolbatan, konsege hadia ona, maibe ida nee kompanhia hadia provizoriu deit, kontinuasaun atu normaliza Estrada nee, kompetensia governu, tanba nee husu ba governu Autoridade atu tau matan ba Estrada Sikone neebe ameasa sei aat grave liu tan iha tempu udan,” dehan nia.
Tuir observasaun STL iha Estrada aat Sikone, motorist neebe halo movimentu ba mai, obriga deit kareta no motor hodi halo movimentu, balun hetan dezastre motor barak maka sai vitima kanek, ain tohar, tanba monu ho sira nia motor, tanba rai sae makaas akompanhia ho rai rahun tanba kareta maka estraga.
Jornalista: Joseph Koa
Editor: Joseph Koa
