BAUKAU, STLTIMORLESTE.com – Komunidade Agrikultores sira iha Suku Buruma, Postu Administrativu Baukau Vila, Munisipiu Baukau, neebe durante nee menus hetan asistensia teknika Agrikultura nian husi estensionista sira, tanba pesoal estensionista neebe iha Baukau la sufisiente atu kobre Suku 62.
“Ita iha Baukau 62 Sukus estensionista iha nain 34 entaun daudaun nee estensionista seidauk sufisiente ba ida nee, tuir planu neebe ami foin daudauk halo 2026 atu rekruta extensionista mais seidauk hatene, tanba orsamentu tama ba adisional, maibe tama 2026 mak ita foin hatene rekruta ga lae,” hateten Direito Servisu Munisipal Agrikultura Baukau, Agostinho Ximenes ba STL, iha knaar fatin Vila Nova Baukau, Kinta (11/09/2025).
,
Nia sublina, relasiona pesoal estensionista neebe daudaun halao servisu iha Munisipiu Baukau seidauk kobre Suku 62, tanba estensionista ativu nain 34 mak liu husi enkontru nivel Nasional parte Servisu Munisipal relata ona ba Ministeriu no tuir planu sei halo rekrutamentu iha tinan 2026, maibe depende ba Nasional.
Tanba daudaun estensionista nain 34 obrigatoriu nain ida kobre Suku 2, maibe fo impaktu ba estensionista sira, tanba laiha transporte hodi fasilita sira halao servisu iha terrenu.
“Klaru katak sira laiha transporte husi Suku ida ba ajuda Suku seluk mos difisil, tanba transporte agora daudaun laiha, entaun durante nee balun utiliza transporte privadu balun laiha transporte entaun ida nee difikulta sira fo asistensia tekniku ba komunidade Agrikultura ba Suku neebe sei menus hela,” Agostinho fundamenta.
Nia rekonhese komunidade agrikultores iha Suku Buruma sei menus asistensia teknika husi estensionista sira, tanba durante nee iha deit pesoal estensionista José António neebe nia kobrementu ba Suku 2 hanesan Buruma no Seisal.
“Entaun nia labele lao hotu, tanba Seisal mos area boot lao deit distansia dook uza nia transporte privadu maibe kombustivel mos laiha ida nee mak impaktu servisu,” Agostinho Ximenes akresenta.
Diretor Munisipal nee argumentu, Servisu Munisipal Agrikultura Baukau iha inisiativa atu akumula komunidade agrikultores sira kada Suku iha fatin ida kapasita liu husi formasaun, maibe labele realiza, tanba kestaun finanseiru.
“Hau hanoin bele tau iha fatin ida fo formasaun, maibe ida nee mos presiza orsamentu, tanba agora daudaun Diresaun Servisu Munisipal Agrikultura orsamentu operasional ba extensionista sira uluk nee iha, maibe tinan 2024 2025 nee laiha ona entaun ida nee mos impaktu ba sira,” Agostinho katak
Tuir Diretor nee katak, extensionista parte prinsipal ida atu kapasita komunidade agrikultores sira aumenta numeru produsaun, maibe husi tinan 2024 too 2025 nee extensionista sira difikulta problema barak mak hanesan laiha orsamentu operasional, laiha transporte no seluk tan neebe limita extensionista sira halao servisu iha terrenu ho diak.
Tanba problema hirak nee enkaixa ona iha planu 2026 nian no relata ona ba Nasional, maibe atu fo rezultadu klaru depende ba Ministeriu.
Jornalista: Tomas Reis
Editora: Carme Ximenes
