DILI, STLTIMORLESTE.com – Ekipa husi Prezidensia Republika (PR) hamutuk ho parseiru dezenvolvimentu fo formasaun ba feto, hodi habelar iha vida negosiu nia.
Unidade Empoderamentu Ekonomiku Feto (EEF) Gabinete Prezidente RDTL, halo kolaborasaun ho Grupu Bankariu Australia no Nova Zelandia (ANZ), fo formasaun inspiradora ba feto nain 21 iha Munisípiu Bobonaro, Postu Atabae.
Treinamentu nee halao durante loron rua nia laran, hamutuk ho feto nain 21 resin neebe hahu no dezenvolve sira nia negosiu mikro.
Tuir komunikadu neebe STL asesu husi media Prezidensia Republika Kinta (11/09/2025) hatete, sesaun empoderamentu ida-nee foka ba abilidade pratika jestaun finanseira no estratejia sira, atu ajuda feto sira nee hametin no habelar sira nia negosiu.
Husi orsamentu no poupansa ba planeamentu ba kresimentu iha futuru, formasaun fornese ferramenta esensial sira ba susesu iha tempu naruk.
Inan Feto sira-nee laos deit harii sira nia negosiu maibe kria futuru diak liu ba sira-nia an rasik, ba família, no sira-nia komunidade. Inan sira mos sente orgulhu atu apoia sira nia viajen ba independensia ekonomika no reziliensia.
Nunee mos iha fatin ketak Diretora Fokupers, Domingas Afonso Amaral hatete, feto barak empoderada iha parte hakbiit ekonomia.
Nia dehan, governu liu husi Sekretariu Estadu ba Igualdade (SEI), ho organizasaun luta ba feto kontinua hakbiit feto, oras nee komesa empoderada iha parte hakbiit ekonomia nia.
“Tuir ami nia observasaun abranzu komesa haree katak, iha avansu feto barak komesa empoderada, liu liu iha parte hakbiit ekonomia nia. Iha formasaun barak neebe mak ita organizasaun entidade hotu hotu tantu governu no sosiedade sivil organizasaun internasional sira ema hotu hotu kuaze foti assuntu ida nee sai hanesan sira nia ajenda tanba ita haree katak bainhira feto ida forte iha ekonomia ida nee ita komesa involve ona feto nia partisipasaun iha setor ekonomia,” katak nia.
Nia hatete, bainhira feto apoiu iha ekonomia bele apoiu makaas iha familia, no familia mos moris hakmatek.
Jornalista: Emerenciana Pinto
Editora: Domingas Gomes
