DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, fundu minarai tenke fo benefisiu ba jerasaun no jerasaun.
Liafuan nee Eis Primeiru Ministru, Mari Alkatiri hatoo ba Jornalista iha salaun CCF Komoro, Kinta (11/09/2025).
Nia hatete, fundu minarai tenke fo benefisiu ba jerasaun no jerasaun.
“Hau dehan fundu minarai tenke fo benefisiu ba jerasaun no jerasaun, hau hatete kedas semak uluk membru Governu balun iha nee hau dehan dolar 1 sai husi fundu minarai tenke iha returnu. Teturnu nee iha saida a longu prazu investe iha edukasaun, investe iha saude, investe iha ekonomia ida sustentavel neemak la akontese,” dehan Mari.
Nia dehan, lei define kedas 3% despeza ba korentes nee Governu nia direitu laos labele hasai tan, bele hasai maibe tenke iha investimentu ho returnu, investimentu ho returnu tempu naruk mak edukasaun no saude tempu badak mak ekonomia.
Nia hatete, koalia konaba korupsaun nee ribuan juta, maibe kareta 65 ba deputadu sira ema halo demo nee ema balun husi kotuk karik.
“Tanba saida, tanba se mak ukun halo korupsaun parlamentu nee maioria iha oposizaun atu tau hotu deit saku ida hanesan hotu. Nee objetivu mak nee hau laos dehan iha direitu ka laiha direitu, hau dehan deputadu sira simu knaar atu kumpre sira nia knaar, sira atu lao deit halo fiskalizasaun laiha kondisaun, entau meus transporte nee importante tebes. Entau jestaun mak tenke hatene, halo nusa hau atu dehan, hau nia kareta tinan 18 ona hau sai Primeiru Ministru mos lao ho kareta ida nee, maibe hau halo konta lo-loos manutensaun de kareta hau bele sosa kareta rua ona neemak ita hakarak halo jestaun ba ekonomia estadu nia, manutensaun nee karun liu dukue sosa kareta foun,” hakotu nia.
Jornalista: Emerenciana Pinto
Editora: Domingas Gomes
