DILI, STLTIMORLESTE.com – Profesores kada materia husi Eskola Sekundáriu Jeral FINANTIL hahu uza projetor ba iha prosesu ensinu aprendizajen ba estudantes sira.
Liafuan nee hatoo husi Diretor Eskola Sekundáriu Jeral FINANTIL, Aniceto Berlelo ba STL, Segunda nee (02/02/2026).
“Ami iha ona mudansa, tanba ami nian sala uza ona projetor, tanba nee ami nian profesores sira halao aprendizajen nee uza ona projetor deit, tanba ami instala hotu ona iha ami nian sala aprendizajen neen, no sira seluk neebe mak seidauk nee uza projetor movel, nee uza ba iha materia hotu, husi kada profesores idak-idak nee uza hotu projetor,” tenik nia.
Nia dehan, uza projetor nee hahu iha fulan Janeiru tinan ida nee, tanba husi Ministeriu Edukasaun halo distribuisaun dijitalizasaun ba iha sira nian eskola, nee duni fulan rua tolu mai kada estudantes mai eskola tenke lori telefone, lori livru nafatin, inklui lori ho laptop, atu nunee estudantes sira mos bele halo pratika ida nee.
“Dala ruma profesor ida rai hela materia ba sira, atu nunee estudantes sira mak halo operasi, durante iha implementasaun ba dijitalizasaun nee prezensa estudantes sira nian kada loron iha eskola kapas tebes, tanba sira gosta, tanba nuudar estudantes nee hakarak ba oin, laos atu ba fali kotuk,” nia afirma.
Nunee mos Direitor Eskola Sekundariu Jeral 10 Dezembru Komoro, Manuel Verdia ldehan, sira nian ensinu aprendizajen sei nafatin hanesan bai-bain, tanba sira seidauk hetan projetor, maske eskola públiku balun mak hetan ona.
“Hau hanoin ami nian eskola la hetan projetor, maibe ita nian eskola seluk agora daudaun halao aprendizajen nee hahu uza ona dijitalizasaun, tanba hetan fasilidade husi ita nian ministériu, maibe ami nian eskola rasik seidauk hetan,” nia esplika.
Manuel dehan, sira seidauk hetan, nunee profesores sira halao aprendizajen lao hanesan baibain, tanba sira seidauk hetan projetor husi ministeriu, eskola públiku balun deit mak halo aprendizajen uza ona projetor.
(jac)
