DILI, STLTIMORLESTE.com – Direjente husi Edukasaun Pre eskolar, Ensinu Baziku no Ensinu Baziku Filial (EBF) husi eskola sira Munisípiu Vikeke sei partisipa formasaun iha fulan nee nia laran.
Kestaun nee hatoo husi Diretor Servisu Edukasaun Munisipiu Vikeke, Julio Sacadura ba STL liu husi telefone, Segunda nee (02/02/2026).
“Hau hanoin iha loron 9 Fevereiru 2026 sei halao formasaun ba ita nian direjentes husi nibel EPE, EBC no EBF iha salaun SME Vikeke. Formasaun ba ita nian direjente eskola sira nee kona-ba implementasaun programa merenda eskolar tinan 2026. Formasaun refere sei fo husi Diresaun Nasional programa merenda Ministeriu Edukasaun,” nia dehan.
Nia dehan, tanba nee direjente sira husi nivel neebe mak mensiona, sira nee sei partisipa iha formasaun, tanba formasaun nee importante tebes para sira bele hatene kona-ba lalaok implementa programa merenda eskolar iha sira nian eskola.
Nunee mos Belchior Maria Almeida Barros hanesan Xefe Departamentu Programa Merenda Eskolar iha ME dehan, Ministeriu Administrasaun Estatal (MAE) liu husi Dirasaun Nasional Planiamentu Finansa Munisipiu mak sei Organiza ho Diretor Finansas Munisipiu ho Diretor relevante sira iha munisipiu, hodi bele fo formasaun ba direjente husi eskola sira.
“Formasaun parte husi MAE liu husi Dirasaun Nasional Planiamentu Finansa Munisipiu mak sei Organiza ho Diretor Finansas munisipiu ho Diretor relevante sira iha munisipiu maka sei organiza formasaun ba direjente eskola Sira,liu-liu oinsa maka atu jere programa merenda eskolar nee ho diak,” nia deklara.
Nia dehan, informasaun neebe iha katak, Ermera sei kontinua ho EJP husi primeiru trimestre nomos husi Munisípiu Baucau EJP muda ba grupu komunitariu no munisipiu seluk husi eskola mak sei jere programa nee.
(jac)
