BAUKAU, STLTIMORLESTE.com – Hospital Rejional Eduardo Ximenes (HoREX) Baukau rejistu kazu dengue hamutuk 56 maioria afeta ba labarik.
Diretor Klinika HoREX, Mediku Mozinho Francisco informa, durante fulan Janeiru tinan 2026 HoREX hahu rejistu kazu dengue hamutuk 53 no iha inisiu fulan Fevereiru nee rejistu tan 3 neebe akumulativu 56 afeta ba kazu dengue.
“Dengue iha HoREX maioria labarik kiik oan mak barak ema boot ida rua deit maibe barak liu nee labarik kiik, balu too grave maibe la rezulta mate,” hateten Mozinho ba jornalista sira iha nia knaar fatin HoREX Baukau, Tersa (03/02/2026).
Nia komenta, husi 53 neebe rejistu iha fulan dahuluk tinan 2026 pasiente dengue kategoria kondisaun grave sira, parte HoREX tenke transfere besik nain 10 ba Hospital Nasional Guido Valadares (HNGV) Dili, tanba HoREX laiha stok reajente, maibe dadaun stok reajente sufisiente fo atendimentu ba pasiente dengue sira iha HoREX.
Nia sublina, husi pasiente dengue neebe daudaun HoREX rejistu balu hahu rekupera ona no balu kontinua hamutuk ho 3 foun sei baixa hela iha sala pediatria neebe mediku sira kontinua fo tratamentu.
“Ami iha nee fo tratamentu ba sekundaria oinsa atu rekupera pasiente atu hakotu dengue. Aimoruk espesifiku ba dengue laiha ita haree nia sintomatiku nia isin manan ita auguenta soru. Durante nia masa inkubasaun ita so observa deit para labele monu ba nia masa kritis, ida nee mak durante nee ita halo tratamentu ba dengue,” katak Mozinho.
Mediku nee esplika, aimoruk espesifiku ba atende pasiente dengue laiha, maibe durante nee mediku sira observa pasiente dengue iha masa inkubasaun atu la afeta ba grave.
Entretantu pasiente dengue neebe daudaun halao tratamentu iha HoREX Baukau kompostu husi Munisipiu Lautem, Vikeke inklui Munisipiu Baukau.
(tom)
