DILI, STLTIMORLESTE.com – Servisu Edukasaun Munisipiu Ainaro nafatin halo koordenasaun neebe diak ho parte inspetores sira neebe halo identifikasaun profesores iha eskola sira.
Asuntu nee hatoo husi Diretor Servisu Edukasaun Munisipiu Ainaro, Patricio da Costa Magno ba jornalista STL liu husi telefone, Tersa nee (03/02/2026).
“Kona-ba ita nian eskola hira mak atu aumenta profesores, nee ita seidauk hatene, tanba ita nian inspetores eskolar sira mak sei halo hela identifikasaun ba iha eskola sira, nee duni ami sei koordena ho sira, maibe ita nian eskola barak mak presiza atu aumenta profesores, agora ninia kualidade nee mak ita seidauk hatene lo-loos, tanba ita nian inspetor sira mak toma konta ba iha postu idak-idak,” nia dehan.
Nia hatutan, identifika profesores iha eskola nee husi parte inspetor sira seidauk entrega relatóriu ba edukasaun Ainaro, nee duni presiza koordena ho sira, tanba inspetor ida toma konta eskola sanolu too rua nolu. Total eskola neebe lokaliza iha Munisipiu Ainaro hamutuk ho eskola cafe 94, nee ba ensinu baziku no filial, tekvo tolu, sekundariu ualu, nee sira ho paralelu.
Nunee mos Superintendente Edukasaun Munisípiu Dili, Cesarina C. Guterres dehan, agora daudaun dadus neebe tama ona iha administrasaun mai husi nivel eskolaridade, EPE hamutuk 12, EBC no EBF hamutuk ona 40, Eskola ESG hamutuk 6 no ESTV foin mk 1, total provizoriu eskola hamutuk 59 mak entrega ona dadus mai iha Gabinete Inspesaun Edukasaun Munisipiu Dili.
“Relasiona inspetor no inspektora sira nia servisu iha atividade monitorizasaun, oras nee daudaun inspetores sira rekolha hela dadus manorin no ajente administrasaun sira iha eskola no tuir mai daudaun inspetores sira Ensinu Báziku mos halo hela observasaun ba sala de aula iha eskola Filial sira maibe ami nia tarjetu ba iha manorin klase 1, 2 no 3 ano, inspetores sira uza Programa Coboccolet hodi halo Observasaun sala de aula liu husi formatu Inspesaun rutina,” tenik nia.
Nia dehan, nafatin halo monitorizasaun ba eskola sira iha Munisípiu Dili, tanba liu husi monitorizasaun neebe Inspetores sira halo hodi bele rekolha dadus manorin sira iha eskola Munisípiu Dili.
(jac)
