DILI, STLTIMORLESTE.com – Eskola Sekundáriu Jeral 10 Dezembru Komoro simu konsesaun tarde, tanba falha iha relatoriu.
Lia hirak nee hatoo husi Direitor Eskola Sekundariu Jeral 10 Dezembru Komoro, Manuel Verdial hatete, kona-ba konsesaun eskolar too agora sira seidauk simu, tanba sira foin konklui sira nian relatóriu ba Ministériu Edukasaun.
“Hau hanoin konaba konsesaun eskolar nee tanba falha iha relatóriu, laos ami mesak lae, maibe husi ita nian eskola idak-idak relatóriu la hanesan, maibe ami rezolve ona, tanba nee ami foin mak konklui ami nian relatóriu ba Ministériu Edukasaun, nee duni eskola sira sekundariu iha Munisípiu Dili neebe relatóriu ami submete ona hein katak iha fulan ida nee osan nee bele sai ona,” dehan Manuel ba STL Tersa nee (03/02/2026).
Manuel hatutan, konsesaun eskolar nee kada estudante ida dolar rua no eskola uza osan ida nee sei tuir duni nesesidade eskola nian, nee duni durante nee sira ezekuta osan ida nee tuir nesesidade eskola nian.
Entretantu Diretor Eskola Sekundariu Jeral FINANTIL, Aniceto Berlelo hatete, konsesaun eskolar seidauk sai, maibe husi eskola hatama ona relatóriu ba Ministériu Edukasaun, osan mak too agora seidauk sai.
“Kona-ba konsesaun eskolar too agora ami seidauk simu, maibe ami submete ona relatóriu ba iha parte kompetente no osan konsesaun nee rasik seidauk tama, neebe husi parte eskola nian hein deit, espera too tempu husi ME bele atribui osan ida nee,” nia esplika.
Nia dehan, husi eskola hein deit, tanba relatóriu submete ona ba iha Ministériu Edukasaun, konsesaun nee uza ba eskola nian presiza.
(jac)
