DILI, STLTIMORLESTE.com – Pesoal mediku fo haris hela bee malirin jeleira ba pasiente labarik kiik oan ida, hanesan asaun hodi hatun isin manas neebe makaas, bainhira pasiente nia inan aman lori ba halo tratamentu saude iha Sala Emerjensia Sentru Saude Komoro.
Tuir observasaun STL iha Kuarta (04/02/2026), inan aman husi pasiente nee kous sira nia oan ho kondisaun isin manas, hodi hakat mai konsulta iha sala emerjensia sentru refere. Bainhira tama ba sala konsulta nian, pesoal mediku neebe halo tratamentu koko isin manas, tanba manas makaas entaun mediku nee haruka pasiente nia aman ba sosa bee Agua boot rua malirin jeleira nian, hodi fo haris ba pasiente labarik kiik oan nee.
Durante iha prosesu haris bee malirin nee, mediku nee konsola ba inan aman sira katak, “isin manas makaas hanesan nee kompras deit la diak, manas tun araska. Neebe diak liu mak fo haris bee jeleira deit,” tenik pesoal mediku nee.
Depois fo haris hotu, inan aman husi pasiente kiik oan nee kontinua lori nia ba iha sala konsulta emerjensia nian, hodi halo fali tratamentu ho pesoal mediku neebe fo haris pasiente kiik nee.
Iha fatin hanesan, tuir Pesoal Saude neebe lakohi temi naran hatete, Sentru Saude ida nee kada loron moras dengue nee sempre rejistu hela deit. Se kuandu haree ba kondisaun isin manas kmaan nee fo deit aimoruk ba hemu iha uma, maibe kuandu hasai raan mak hetan dengue nee hakarak lakohi tenke baixa iha emerjensia.
Nia katak, dala ruma fatin atu baixa la too, tanba fatin iha neeba klot, entaun tenke transporta fali ba iha HNGV no Tasi-Tolu.
(dom)
