DILI, STLTIMORLESTE.com – Infraestrutura eskola iha area remotas sai problema, tanba iha eskola balun presiza aumenta sala de aula ba estudantes no balun tenke hadia duni.
Haktuir Diretor Servisu Edukasaun Munisipiu Ainaro, Patricio da Costa Magno katak, kona-ba ekipamentus pratika nian iha ensinu tekniku vokasional nee kompletu hela, estudantes sira bele halo pratika, depois de simu teoria husi profesmsores sira bele halo pratika, liga ba infransturtura eskola nian nee tekniku sira sukat ona, dadus iha hotu ona, hein planu orsamentu husi Ministeriu Edukasaun.
“Defikuldade neebe mak ita nian eskola sira iha Ainaro enfrenta nee mak problema infraestrutura eskola no Rekursu, infraestrutura mos eskola balun deit, laos eskola hotu-hotu, tanba eskola balun mak seidauk diak, sala de aula ba ita nian estudantes sira seidauk sufisiente inklui kondisaun eskola neebe presiza atu hadia, nee manorin Edukasaun pre eskolar no sekundariu ida,” dehan Patricio ba STL liu husi telefone, Kuarta ee (04/02/2026).
Iha fatin seluk, Diretor Servisu Edukasaun Munisipiu Bobonaro, Miguel Freitas hatete, tinan ida nee SEM Bobonaro nafatin identifika kondisaun infraestrutura eskola, maibe tanba daudaun nee udan hela, depois mak ami sei halo kontinuasaun, ita nian eskola 13 nee pre eskolar hotu.
“Iha tinan kotuk ami identifika ona ita nian ensinu pre eskolar hamutuk sanulu resin tolu (13), husi numeru nee ualu (8) halo konstrusaun foun no lima (5) reabilitasaun, agora ba tinan ida nee ami nafatin identifika ita nian infraestrutura eskola atu nunee ita bele hatene lo-loos katak hira mak tama ba konstrusaun foun no hira ba reabilitasaun ninia,” nia deklara.
Nia dehan, iha Munisipiu Bobonaro pre eskolar balun sei didin ho bebak no kalen, ida nee hanesan dezafiu ida ba sira, tanba pre eskolar sira nee didin ho bebak, tanba nee balun atu halo konstrusaun foun no ba reabilitasaun ninia.
(jac)
