DILI, STLTIMORLESTE.com – Inspetores eskolar iha Munisípiu Ainaro nafatin halo identifikasaun fasilidade eskola nian, nunee servisu Edukasaun Ainaro bele halo pedidu ba Ministériu Edukasaun Nasional.
Haktuir Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Kuarta nee (04/02/2026).
“Kona-ba fasilidade eskola nian hanesan meza, kadeira, livrus no kaderneta, livrus ho kaderneta sufisiente hela iha eskola, tanba livrus balun nee sei imprimi hela iha sentru impresaun, bainhira remata imprimi mak bele halo distribuisaun ba iha eskola sira. Agora kona-ba meza no kadeira nee ita identifika ona, ita sei haruka pedidu mai iha Ministeriu Edukasaun, neebe ita nian inspetor sira sei identifika iha eskola sira,” nia esplika.
Tuir nia, bainhira remata identifikasaun iha eskola mak bele hatene lo-loos eskola hira mak atu aumenta meza no kadeira, ho nunee halo pedidu ba Ministériu Edukasaun bele halo distribuisaun tuir nesesidade eskola neebe presiza, tanba labele husu liu fali.
“Nee husi ita nian inspetor sira mak haree hotu ida nee, tanba sira rasik mak too direita iha eskola sira, neebe sira mak sei relata informasaun mai ami liga ba ita nian eskola sira neebe menus meza no kadeira,” nia dehan.
Nunee mos Superintendente Edukasaun Munisípiu Dili, Cesarina C. Guterres hatete, liga ba fasilidade eskola nian nee eskola balun mak presiza meza no kadeira, maibe laos eskola hotu-hotu, nee eskola balun deit.
“Liga ba ita nian fasilidade eskola nian nee eskola balun mak presiza meza no kadeira,.maibe laos eskola hotu-hotu, nee eskola balun deit,” katak nia.
(jac)
