BAUKAU, STLTIMORLESTE.com – Servisu Munisipal Saude Baukau halo ona prevensaun moras dengue ba komunidade sira nia uma hamutuk 1.051 iha Munisipiu Baukau.
Tuir dadus kazu dengue neebe Servisu Munisipal Saude Baukau simu husi Sentru Saude sira durante fulan Janeiru 2026 hamutuk 43 neebe rejistu iha Sentru Saude Baguia kazu 1, Laga 1, Kelikai 2, Vemasi 4, Ossokeli 11, Uailili 11 no Sentru Saude Venilale 13, mak Servisu Munisipal Saude Baukau halo ona esforsu liu husi atividade kontrola vector dengue iha Postu Administrativu Baukau Vila, Kelikai, Venilale no Vemasi.
“Husi ami nia servisu saude Munisipiu Baukau halo ona programa saude ambiental promosaun saude ho vizilansia epidemiolojia ida idak halao nia knaar servisu ba kazu dengue nee,” hateten Xefe Departementu Programa Saude Munisipiu Baukau, Maria Candida dos Reis ba jornalista sira iha Tirilolo Baukau, Kuarta (04/02/2026).
Husi Servisu Munisipal nia esforsu halo prevensaun ba kazu dengue iha Baukau Vila kobre uma kain hamutuk 219 husi Suku 7, Venilale uma kain 397 Suku 5, Vemasi uma kain 180 Suku 3 no Postu Kelikai uma kain 47 kobre Suku 1.
Prevensaun sira nee liu husi distribuisaun ai-moruk abatesasi ba uma kain 400 neebe rejistu iha Postu Administrativu Baukau Vila hamutuk 71, Venilale 95, Vemasi 159, no Kelikai hamutuk 47.
Enkuantu Servisu Munisipal Saude Baukau mos liu husi ekipa halo mos prevensaun ba kazu dengue liu husi halo fumigasaun ba uma kain hamutuk 1.004 kobre Postu Baukau Vila 203, Venilale 397, Vemasi 132 no Kelikai uma kain 47.
“Kona-ba stock abate no malation ami sufisiente tanba tinan tinan ami halo pedidu antes neebe halo abatesasi fulan neen antes udan monu rai,” Maria Candida dos Reis komenta.
Entretantu prevensaun ba kazu dengue iha Munisipiu Baukau liu husi fumigasaun ekipa sira halo deit iha fatin afetadu sira, tanba aimoruk ba fumigasaun bainhira rega beibeik mos dala ruma susuk sai dezistensia ba iha aimoruk malation.
(tom)
