DILI, STLTIMORLESTE.com – Tinan nee Servisu Edukasaun Munisípiu Bobonaro identifika eskola sekundariu no Ensinu Baziku 27 neebe lokaliza iha Munisípiu refere, too agora laiha guarda eskola.
Lia hirak nee Diretor Servisu Edukasaun Munisípiu Bobonaro, Miguel Freitas ba jornalista STL liu husi telefone, Kinta (05/02/2026).
“Kona-ba guarda eskola nian ami identifika hotu ona, ita nian eskola hamutuk 27, nee ami foin identifika iha tinan ida nee nia laran, hahu iha fulan Janeiru nee, tanba nee ami sei halo pedidu mai iha ME nasional, eskola 27 husi nivel ensinu baziku no sekundariu. Iha tinan hirak liu ba nee guarda eskola laiha, ita nian eskola balun deit mak iha guarda, maibe eskola nee sira tau konfiansa nee ba ita nian komunidade,” dehan nia.
Tanba tuir Miguel, maske eskola hirak nee durante nee laiha guarda, maibe nafatin seguru, tanba hetan konfiansa husi komunidade neebe mak hela besik iha eskola, tanba eskola area remotas nee presiza iha guarda.
Entretantu Direitor Servisu Edukasaun Munisípiu Vikeke, Julio Sacadura hatete, liga ba asuntu guarda eskola nian, nee presiza husu lai dadus, atu nunee bele hatene lo-loos eskola neebe iha guarda no hirak neebe seidauk iha guarda.
“Hau hanoin liga ba asuntu guarda eskola nian nee presiza husu lai dadus, atu nunee bele hatene lo-loos eskola neebe iha guarda no hirak neebe seidauk iha guarda,” nia informa.
Nunee mos Diretor Servisu Edukasaun Munisípiu Manatuto, Patricio da Cruz Quintao dehan, eskola neebe lokaliza iha Munisípiu Manatuto nee balun deit mak iha guarda eskola no balun seidauk iha, maibe lo-loos nee eskola sira nee tenke iha guarda para bele asegura eskola iha area remotas sira.
“Ita nian eskola neebe lokaliza iha Munisípiu Manatuto nee balun deit mak iha guarda eskola no balun seidauk iha, maibe lo-loos nee eskola sira nee tenke iha guarda para bele asegura eskola iha area remotas sira, maibe ita seidauk hatene lo-loos dadus ita nian eskola hira mak iha ona guarda no hira mak seidauk, maibe maioria mak seidauk iha guarda,” nia esplika.
(jac)
