BAUKAU, STLTIMORLESTE.com – Sekretariadu Tekniku Administrasaun Eleitoral (STAE) Munisipiu Baukau, provizoriu la emprime kartaun eleitoral biometriku ba eleitores sira, tanba stock ribon no film hotu.
Diretor STAE Munisipiu Baukau, Natividade Freitas Guterres esplika, STAE Munisipiu Baukau daudaun nee kontinua simu eleitores sira neebe atu trara kartaun eleitoral biometriku, maibe provizoriu labele halo imprimesaun kartaun eleitoral biometriku ba sira, tanba asesoria balu stock hotu.
“Atendimentu sei lao hela, maibe ita nia stock ribon no film mak hotu iha loron 09 Fevereiru 2026 meudia nee,” Diretor STAE Munisipiu Baukau, Natividade Freitas Guterres hateten ba jornalista sira iha nia knaar fatin Vila Nova Baukau, Tersa (10/02/2026)
Nia sublina, razaun atendimentu sei lao tanba tekniku sira kontinua simu eleitores foun no tuan sira nia dokumentus inklui hasai foto ajusta iha sistema, nunee bainhira stock ribon no film iha fali ona bele prosesu ba emrpime hafoin distribui ba nain kartaun eleitoral sira.
Nia fundamenta, relasiona preokupasaun neebe STAE Baukau enfrenta kona-ba ribon no film stock hotu, relata ona pedidu verbal ba nasional atu bele solusiona iha tempu badak hodi imprime kartaun eleitoral biometriku ba eleitores sira. Tanba kartaun eleitoral nuudar dokumentus importante atu trata iha prosesu dokumentus sira seluk.
“stock ribon no film laiha difikulta ita nia eleitores sira hanesan baibain ita hateten, kartaun eleitoral nee nia funsaun ba eleisaun nian, maibe instituisaun abitua ona uza kartaun eleitoral nee sai rekezitu ida atu trata dokumentus, entaun agora ema hotu-hotu ezije,” Natividade akresenta.
Nia rekonhese, relasiona ho stock ribon no film hotu difikulta estudante sira neebe atu trara kartaun eleitoral biometriku foun no seluk tan, tanba tenkinu sira labele halo emprime ho emerjensia atu fasilita sira asesu ba trata dokumentus, maibe iha esperansa katak, pedidu verbal neebe relata ona ba Dirasaun Nasional sei responde iha tempu besik.
Iha sorin seluk eleitores Dalia Madeira husu Dirasaun Nasional atu aselera prosesu transfere stock ribon no film husi Nasional ba STAE Munisipiu Baukau, tanba daudaun labele imprime kartaun eleitoral biometriku ba eleitores sira.
“Ba hau la importante atu lalais, maibe ba maluk sira neebe mak presiza atu foti kartaun eleitoral biometriku ho emerjensia karik nee difikulta ona sira, tanba agora labele imprime atu halo, oinsa sira atu trata dokumentus seluk neebe mak presiza kartaun eleitoral biometriku, tanba nee ita husu Governu haree sasan falta sira nee hadia lalais,” Dalia katak.
Entretantu husi fulan Outubru 2024 too fulan Fevereiru nee STAE Munisipiu Baukau produz ona kartaun eleitoral biometriku ba eleitores sira hamutuk rihun 40 resin.
(tom)
