DILI, STLTIMORLESTE.com – Polisia Nasionál Timor Leste (PNTL) Munisípiu Díli ezekuta mandadu Tribunál Nuc: 0487/25.DIBCR kaptura suspeitu nain rua (2) husi Munisípiu Lautém ho inisial JG no husi Munisípiu Ainaro ho inisial UF relasiona ho kazu violasaun no koasaun seksual ho raptu neebe akontese iha loron 28 Dezembru 2025, iha Postu Administrativu Kristu Rei, Hali Dólar, Hera.
“Suspeitu nain 2 nee iha ligasaun ho kazu neebe akontese iha loron 28 Dezembru 2025, kona-ba kazu violasaun no kazu koasaun seksuál ho suspeitu neebe akontese iha momentu neeba,” hatete Komandante PNTL Munisípiu Díli, Superientendente Xefe Polísia Orlando Gomes ba jornalista sira iha Eskuadra Polísia Dom Aleixo, Sesta (10/02/2026).
Nia informa, mandadu Tribunál ba arguidu nain 4, maibe agora PNTL kaptura ona arguidu nain 2 neebe mak halai ses husi kapitál Díli, daudaun lori ona mai Komando Seksaun Investigasaun, nunee PNTL bele submete ba iha Tribunál.
Nia tenik, autoridade seguransa daudaun nee sei buka tuir arguidu nain 2 neebe mak observa hela, tempu badak polísia sei halo kapturasaun.
Nia informa, Komando Munisípiu Díli detekta arguidu sira nia paradeiru iha munisípiu neebe koordena kedas ho Komando Munisípiu Lautem ho Munisípiu Ainaro hodi koordena ho sira iha terenu para buka arguidu sira subar iha neeba.
“Mandadu detensaun nee depois arguidu sira kumpri detensaun oras 72, depois ita aprezenta ba Ministériu Públiku (MP) mak ba liu iha Tribunál,” nia koalia.
Observasun STL iha terenu, Kinta (04/02/2026) haleu tuku 18:50 loraik OTL, Seksaun Polísia Investigasaun Munisípiu Díli kaptura suspeitu JG iha Lospalos Vila lori mai edifisiu PNTL Komando Munisípiu Díli.
Suspeitu refere uza hela alzema iha liman no lori kedas ba iha edifisiu sub-seksaun Polísia Unidade Vulnerabilidade (VPU) no kontinua ba detein iha sela polísia.
Polísia Seksaun Investigasaun kontinua ba foti mos suspeitu UF iha Munisípiu Ainaro hodi mai detein iha Komando Polísia Munisípiu Díli, Komando Polísia Munisípiu Ainaro oras nee asegura ona suspeitu UF.
(jen)
