DILI, STLTIMORLESTE.com – Velosidade anin ba loron ohin sei intensifika liu, iha neebe sei varia husi forte ba forte liu/extremu (23-40 km/h), iha rejiaun kosteiras/tasi ibun prinsipalmente iha Kosta Norte no Leste, liu-liu iha munisipiu Dili, Atauro, Baucau, Manatuto no Lautem.
Previzaun tempu nee fo sai husi Diresaun Nasional Metereolojuliku Geofisika (DNMG), neebe STL asesu husi pajina offisial media sosial DNMG nian iha Sesta (13/02/2026).
Entretantu restante husi munisipiu sira seluk, kondisaun refere sei huu ho velosidade normal ba moderadu/naton (16-20 km/h), tantu iha rejiaun central no oeste kuantu iha Kosta sul.
Nunee mos kondisaun tempu sei fo atensaun espesial bá udan ho intensidade moderadu/naton (10 mm/dia) ba forte (>20 mm/dia) kuaze iha territoriu nasional.
Tanba nee DNMG hakarak informa ba publiku katak, instabilidade atmosferika ba loron ohin, sei intensifika liu tanba prezensa husi fenomeno meteorolojiku hanaran:( ondas de rossby equatorial), assosia ho fenomeno meteorolojiku seluk (Madden Julian Oscilation “MJO”) iha neebe sei kontinua favorese udan ho intensidade moderadu/naton ba forte, kuaze iha territoriu Timor laran tomak, tantu iha rejiaun kosteiras/tasi ibun kuantu iha rejiaun foho, tantu iha periodu meius diak kuantu iha Lorokraik ba inisiu kalan.
Laloran tasi nia aas ba loron ohin, sei varia husi normal ba moderadu/naton iha Kosta Norte (1.0-1.4 m), liu-liu iha munisipiu sira hanesan: (Atauro, Manatuto, Baucau no Lautem). Exceptu iha Kosta Sul mak kondisaun refere sei varia husi normal (0.5-0.9 m).
(dom)
