DILI, STLTIMORLESTE.com – Prezidente Republika (PR), Jose Ramos Horta hasoru malu ho Care Australia hametin parseria hodi kombate mal nutrisaun, hasae kualidade edukasaun rural.
Prezidente Republika, Jose Ramos Horta simu delegasaun nivel altu husi Konsellu CARE Australia iha Palasiu Prezidensial hodi diskute prioridade dezenvolvimentu estratejiku ba komunidade sira iha area remota no rural iha Timor Leste.
Xefe Estadu fahe ninia vizaun atu aselera progresu iha saude publika, edukasaun no empoderamentu ekonomiku ba feto. Parte rua nee reafirma sira nia kompromisu atu apoia populasaun vulneravel sira iha rai laran, bazeia ba CARE ninia servisu durante dekada tolu ona iha nasaun nee.
Foku sentral husi sorumutuk nee mak nesesidade urjente atu halakon mal-nutrisaun no ras badak ka stunting ba labarik sira liu husi programa merenda eskolar neebe diak liu tan. Prezidente Ramos Horta foka mos ba ligasaun vital entre nutrisaun proteína aas no rezultadu edukasaun, hodi temi ninia vizita foin daudaun ba eskola sira iha foho.
Prezidente no delegasaun CARE konkorda atu dezenvolve planu asaun ida neebe abrangente hodi mobiliza rekursu adisional, hodi garante katak programa “merenda eskolar” bele too ho efektivu ba rejiaun sira neebe susar atu asesu.
Hodi hatudu ninia ambisaun atu fo impaktu signifikativu ba seguransa ai-han durante ninia mandatu, Prezidente simu ho haksolok kolaborasaun neebe lao hela entre CARE no Ministeriu Edukasaun, Saude, no Agrikultura.
Ho apoiu husi governu Australia, parseria nee iha objetivu atu hasae sosa ai-han lokal husi agrikultor Timoroan sira hodi fo han ba jerasaun foun.
Xefe Estadu espreza ninia apresiasaun ba CARE ninia dedikasaun naruk ba dezenvolvimentu Timor Leste no sira nia objetivu hamutuk atu harii nasaun ida neebe saudavel no kbiit liutan.
(eme)
