DILI, STLTIMORLESTE.com – Prezidente Republika (PR), Jose Ramos Horta halo parseria ho organizasaun Mundial Saude hodi kombate dengue no hadia saude nasional.
Prezidente Republika, Jose Ramos Horta hasoru malu ho Reprezentante Organizasaun Mundial Saude (OMS), Arvind Mathur, iha palasiu Prezidensial hodi simu informasaun foun neebe abranjente konaba evolusaun surtu dengue iha Timor Leste.
Reprezentante Organizasaun Mundial Saude (OMS), Arvind Mathur ba jornalista iha palasiu Prezidensial Nicolau Lobato, Bairo Pite Kinta (12/02/2026) hatete, hasoru malu ho Prezidente hodi update konaba moras dengue neebe mak akontese iha Timor leste ligasaun ho serbisu hamutuk ho ministeriu saude ho parseru OMS oinsa kombate moras dengue iha rai laran.
“Ministeriu saude mos serbisu hamutuk ho OMS atu habelar imformasaun nunee bele prevene moras dengue no redus susuk iha Timor, no OMS hamutuk ho Ministeriu Saude serbisu hamutuk oinsa mak bele halo redasaun ba moras dengue,” katak Arvind.
Prezidente fo nia apoiu ba investigasaun konjunta iha terrenu neebe Ministeriu Saude no OMS halao hela hodi identifika kauza sira husi kazu aumenta nee no implementa medida kontrolu neebe planeadu.
Iha biban nee Mathur garante ba Prezidente katak esforsu hotu-hotu halao hela hodi kontrola surtu nee liu husi aumentu konesimentu publiku no inisiativa oho kutun (larvisida).
Diskusaun nee mos foka ba prioridade saude tempu naruk nian, inklui susesu programa saude eskolar hanesan fo ai-moruk lumbringa no teste saude primaria ba labarik sira.
Mathur fo sai ba Xefe Estadu kona-ba Enkontru Comite Regional OMS ba dala-79 ba Sudeste Aziatiku, neebe Timor Leste sei sai nian-nain iha fulan setembru.
“Eventu prestijiozu nee sei lori ministru saude sira husi nasaun membru 10 no lideransa senior OMS nian, inklui Diretor Jeral, mai Dili hodi diskute governansa saude regional no dezenvolvimentu kapasidade,” katak nia.
Iha biban nee Prezidente Republika Jose Ramos-Horta reafirma nia kompromisu hodi hametin sistema saude nasional, liu liu iha jestaun moras la hadaet hanesan diabetes no ipertesaun liuhusi Programa Integradu Saude.
Hodi hametin liu tan parseira estratejika nee, Prezidente fo indikasaun kona-ba posibilidade vizita ida ba sede OMS iha Jenebra hodi hasoru malu ho Diretor Jeral Tedros Adhanom Ghebreyesus.
Enkontru nee termina ho Prezidente neebe fo louvor ba OMS nia apoiu tekniku kontinua iha dezenvolvimentu polítika no estratejia saude neebe forte ba povu Timor.
(eme)
