DILI, STLTIMORLESTE.com – Ministru Obras Publika (MOP), Samuel Marcal relata planu konstrusaun Jardim husi ponte Habibie too Kristu Rei ba Prezidente Republika (PR), Jose Ramos Horta.
Bainhira remata hasoru malu, Ministru Obras Publika (MOP), Samuel Marcal ba jornalista sira iha Palasiu Prezidensial Nicolau Lobato, Bairo Pite Sesta nee (13/02/2026) hatete, halao enkontru nee Prezidente Republika mak konvida, hodi mai aprezenta planu konstrusaun Jardim husi ponte Habibie too Kristu Rei ba Xefe Estadu.
“Mai enkontru nee Prezidente Republika mak bolu mai para aprezenta ba Prezidente Republika, kona-ba planu Jardim husi Habibie too Kristu rei neeba, Prezidente mos iha planu ida iha tempu badak sei iha mos Estatua Lafaek ida para atu tau iha rotunda parte Prezidente nia nee mak ohin mai aprezenta hela dezenhu nee ba Prezidente, no Prezidente konkorda kontente haree dezenhu neebe iha,” dehan Ministru.
Prezidente Republika kontente haree dezenhu neebe MOP aprezenta, Prezidente husu MOP atu hahu ona obra nee no ninia konstrusaun sira nee bele hahu daudaun ona hodi hein bainhira estatua Lafaek nee too mai.
Ministru hatete, konstrusaun ba Jardim agora daudaun hahu ona parte iha Ponte Habibie nia rohan, maibe iha enkontru nee Prezidente husu fatin neebe tau Estatua Lafaek nee mak husu atu komesa daudaun ona para hahu nia kontrusaun tau estatua Lafaek nee.
“Foin mak koalia, seidauk iha kompanhia ida atu halo, depois mak hahu dezenhu detalhadu, ohin ami mai aprezenta deit nia konseptu depois Prezidente konkorda ona ami ba halo ninia detalhadou hodi bele halo implementasaun,” katak Ministru.
Konstrusaun ba Jardim nee maizumenus ho montante orsamentu hira? hatan ba kestaun nee Ministru hatete, kuandu too detalhadu mak bele hatene nia orsamentu hira.
Estatua Lafaek nee husi Portugal, maibe halo estatua nee iha Xina, parese fulan oin too Timor Leste, depois sei tau iha Rotunda ida besik residensia Prezidente Republika Jose Ramos Horta nian iha Metiaut.
Prezidente Republika Jose Ramos Horta mos koalia ona kona-ba tau estatua Lafaek iha Metiaut nee ba Primeiru Ministru Kay Rala Xanana Gusmão no Primeiru Ministru karik konkorda ho ideia husi Prezidente nian.
Membru Governu nee hatete, planu Governu liu husi Ministeriu Obras Publika atu halo jardim husi Ponte Habibie too Kristu Rei daudaun nee sei prepara hela, maibe detalhadu ona ho montante orsamentu hira depois mak bele hatene klaru.
Karik konstrui Jardim sei hasai ona uma neebe iha tasi ibun sira nee ka oinsa? Hatan ba kestaun nee Ministru hatete, ohin aprezenta ba Prezidente katak nee Governu nia planu Prezidente mos konkorda.
“Prezidente dehan hau konkorda tebes inklui hau nia uma mos se Governu iha planu ba sobu la presiza fo indemnizasaun, neebe hau mos aproveita oportunidade ida nee aviza hela mos ba maluk sira iha tasi ibun neeba laos sobu deit maibe sei prepara mos kondisaun ba negosiante sira, nunee depois kontrusaun hotu sira bele tama fila fali utiliza fali fatin sira nee hodi kontinua sira nia negosiu,” katak nia.
Timor Leste tama ona ba membru ASEAN, tuir planu katak iha tinan hira mai sei sai mos uma nain ba iha simeira ASEAN nia, entaun presiza hadia infraestrutura, tanba nee husu hotu-hotu koopera ho estadu, nunee fo oportunidade ba Governu halo infraestrutura.
(eme)
