DILI,STLTIMORLESTE.com – Jurista Timoroan konsidera katak, importante duni harii sentru juvenil, atu bele tau foin sae sira neebe komete krime.
“Hau hanoin importante duni harii sentru juvenil, tanba ohin loron seidauk iha fatin ida ketak hodi tau dadur sira neebe ho idade kiik,” dehan Jurista Jose Maria Guterres ba jornalista STL iha Kaikoli, Sesta (13/02/2026).
Nia argumenta, dadur neebe idade kiik labele tau hamutuk ho dadur neebe idade boot, tenke tau sira ketak, kria atividade ba sira tuir idade neebe sira iha, nunee sai iha liur sira labele halo tan krime.
Nia dehan, ohin loron seidauk iha sentru ida ketak, tanba nee dadur juvenil sira sei tau deit iha prizaun sira neebe iha ona. Tanba nee ba oin presiza kria duni sentru juvenil ida, ho nia atividade neebe barak oinsa bele transforma sira nia hanoin.
Iha fatin ketak, Jurista Sergio Dias Quintas dehan, estabelese sentru juvenil atu akomula minoridade sira.
“Hau nia hanoin importante para governu estabelese sentru juvenil, para asegura direitu minoridade sira nee, tanba wainhira minoridade mak pratika krime ruma sira labele kastigu hamutuk ho ema boot iha prizaun,” dehan Sergio.
Nia hatutan, laos tanba razaun sira ida sei kiik husik deit sira livre lae, maibe wainhira iha ona sentru juvenil sei akomula sira iha neeba hodi eduka sira, portantu sentru juvenil nee importante ba vida moris joven minoridade neebe pratika krime.
Antes nee Ministru Justisa Sergio Hornai deklara ona katak, prosesu harii sentru juvenil lao hela no tuir planu sei halo iha Tibar.
(ter)
