DILI, STLTIMORLESTE.com – Planu IX Governu Konstitusional neebe dadaun lao liu-liu foka ba alargamentu estrada alias haluan estrada iha Kapital Dili nuudar Kapital Nasaun Timor Leste (TL) sei lori benefisiu ba futuru nasaun.
Dehan Xefe Suku Becora, Antonio da Silva Soares ba STL iha nia knaar fatin Sede Suku Becora, Kinta (26/2/2026).
Tuir Antonio, TL ukun-aan halo tinan 20 resin oan tanba nee tempu ona kria dezenvolvimentu ba rai ida nee liu-liu iha Kapital Dili atu nunee hatudu ba mundu katak TL nuudar nasaun kiik ida foin ukun-aan maibe progresu ba denzenvolvimentu liu-liu parte infraestrutura la lakon ho nasaun selu.
Tanba nee, parte komunidade Becora liu-liu ba sira neebe nia rai privadu kona projetu alargamentu estrada parte balun antes nee la konkorda maibe ho esforsu governu neebe iha vitima ka komunidade balun simu ona osan indemnizasaun hotu-hotu nonok ona.
“Sira antes nee halo protestu makas, mai ho argumentu oin-oin tanba kestaun sira nia rai provadu, maibe ikus mai governu responde ona sira nian preokupasaun katak simu ona osan indemnizasaun maske balun simu ona, balun ladauk simu hotu-hotu nonok ona,”katak Antonio.
Autoridade Suku Becora nee husu ba komunidade sira koopera planu governu ba intrese dezenvolvimentu, tanba dezenvolvimentu neebe governu halo liu-liu alargamentu estrada ka haluan estrada kapas tebes ninia benefisiu ba povu hotu-hotu iha future mai.
Nunee mos, alargamentu estrada neebe dadaun tama iha area Suku Becora laos tuir estrada boot husi Ponte Maufelu ba too Terminal Becora deit, maibe tama mos fatin seluk komesa husi Sede Suku Becora liu ba too Bekusse no fatin seluk tan, tanb nee ba komunidade sira neebe hela iha area neebe tama ona lista alargamentu estrada husu kopera.
Autoridade Suku Becora, Postu Administrativu Cristu-Rei, Munisipiu Dili sente preokupasaun oituan ba bee-moos tanba ho projetu alargamentu estrada neebe lao iha area Suku Becora kona kanu instalasaun bee-mos kuase naksobu hotu. Tanba nee, dadaun komunidade Becora infrenta bee-moos, maske governu kria ona bee bomba iha fatin balun maibe la sufisiente atu responde nesesidade komunidade nia.
(ger)
