AMBENO, STLTIMORLESTE.com – Amo Foranu Parokia Nossa Senhora do Rosario Oecusse, Pe. Carlos de Deus liu husi ninia omilia misa requiem ba maktoban Marselina Suni, inan husi Xefe Suku Costa, Francisco Lolo dehan, atu hetan moris rohan laek nee liu husi mate, labele fiar liu mundu nia ksolok, dala barak lori ba sala.
“Ba familia em lutada, maktoban Inan Marselina Suni ho sarani sira hotu mak Nai Jesus Kristu Hadomi, Nai Maromak nia futar liafuan sira neebe ita rona, sempre fo atensaun ba esperansa, fo laran metin mai ita, atu ita bele moris iha fiar no laran metin iha nia. Ita ema, dalan mate, atu hasoru Maromak, hetan ksolok rohan laek iha Maromak nia futar oin, tenke liu husi dalan mate, dalan mate nian mak sei lori ita ba hasoru Nai Maromak, moris mundu ninian, Maromak fo espasu no fatin mai ita atu hela,” dehan Amo Foranu Parokia Nossa Senhora do Rosario Oecuse, Pe. Carlos de Deus liu husi ninia omilia bainhira prezide misa requem ba maktoban Marselina Suni, inan husi Xefe Suco Costa, Francisco Colo iha Kapela Cruz, Aldeia Oesono, Suku Costa, Postu Administrativu Pante Makassar, Rejiaun Administrativa Espesial Oecusse-Ambeno (RAEOA), Kuarta (04/03/2026).
Nia dehan, durante sei moris iha mundu nee, sarani hotu-hotu tenke buka halo buat diak iha moris sarani sira nian loron-loron.
“Ita sente katak, moris mundu ida nee nia diak, ita sei ba hamutuk ho Nai Maromak, tanba nee maka livru Job nian, haktuir mai ita, oinsa job ninia esperansa, job ninia esperensia moris nian, job hakarak relata mai ita atu preprara ita nia aan tomak, maske iha riku soin barak, maibe wain hira ita hadook aan husi Maromak, riku soin mundu nian nee, la iha folin no la iha kbiit, tanba riku soin, sei la salva ita nia klamar, tanba nee Jesus dehan, hau mak dalan, lia loos no moris,” dehan nia.
Nia dehan, Jesus hatudu ona dalan ba sarani hotu-hotu atu moris tuir nia dalan maka lia loos, tanba nee labele duvidas atu ba too Maromak, tanba Maromak hatudu ona katak Nia mak moris hias no moris nia nain, ema neebe fiar Jesus nia sei hetan moris rohan laek.
“Tanba nee maka familia sira hotu hamutuk ho Nai Xefe Suku Costa, Francisco Colo ho familia em lutada sira hotu, neebe lakon inan doben, Marselina Suni neebe husik hela familia no oan mane ho bee oan sira, ita fiar iha Maromak, tanba Maromak sei lori nia klamar, ba haksolok iha moris rohan laek, nunee mos ba ita hotu, iha tempu korezma nia laran, mai ita buka atu prepara ita nia aan, prepara ita nia fuan no prepara ita nia laran, labele kesi metin ita nia aan ba buat mundu nian, neebe dala barak halo ita monu ba salah, dala barak halo ita lakon fiar, esperansa iha Nai Maromak,” dehan nia.
Hafoin prezide misa, Amo Parokia fo bensaun ba Maktoban Marselina Suni ninia isin mate, nunee familia ba haloot iha fatin deskansu ikus Semiteriu Cruz, bairru Oesono, partisipa husi Diretor Rejional Juventude no Desportu, Carlos de Almeida, Diretor Rejional Transporte no Komunikasaun, Domingos de Almeida, Reprezentante Veteranus iha Autoridade RAEOA, Constancio Suni, Estrutura Partidu Kongresu Nasional Rekonstrusaun Timorense (CNRT), Xefe Suku sira, Xefe Aldeia sira iha Oecusse ho Familia boot Suni-Colo.
(jos)
