BAUKAU, STLTIMORLESTE.com – Projetu neebe atu implementa husi Programa Nasional Dezenvimentu Suku (PNDS) tinan nee, suku 62 neebe eziste iha Munisipiu Baukau, maioria prioridade ba estrada no bee moos.
Diretor PNDS Munisipiu Baukau, Amaro Gusmão Gama Fernandes esplika, iha tinan 2025 projetu husi PNDS implementa deit iha Suku 59, maibe tinan nee sei implementa iha Suku 62, neebe ekipa PNDS munisipal halo ona levantamentu iha suku balu no daudaun prepara ona BQ no dezenhu ba implementasaun projetu sira iha nivel suku, tuir planu iha fim fulan Marsu nee no inisiu fulan Abril tinan nee.
“Ami haree ba tinan ida nee maioria mak estrada no bee moos, tanba husi parte edukasaun ho parte saude nian mak ami sei la implementa konstrusaun, tanba iha karta sirkular husi sua exselensia Ministru Administrasaun Estatal fo sai katak, suspende provizoriu,” hateten Diretor PNDS Munisipiu Baukau, Amaro Gusmão Gama Fernandes ba STL iha nia knaar fatin Vila Antiga Baukau, Kuarta (04/03/2026).
Nia sublina, suku sira neebe iha planu prioridade ba bee moos kompostu husi tipu servisu sira hanesan halo extensaun ba bee moos, melhoramentu, konstrusaun, perfurasaun no reabilitasaun ba bee moos.
Enkuantu suku sira neebe iha planu prioridade ba estrada kompostu husi tipu servisu sira mak hanesan loke estrada foun no reabilitasaun estrada husi aldeia ba suku no husi suku ba suku, tuir planu suku nian neebe aprezenta ona.
Nia fundamenta, planu prioridade rua refere diriji husi suku neebe mak hatene liu komunidade sira nia nesesidade, nunee bainhira planu prioridade hirak nee implementa, bele ajuda ona komunidade sira iha baze asesu ba infraestrutura bazika sira.
“Husi parte PNDS haree katak bele ajuda ona sira nia komunidade, tanba sira rasik mak hatene atu implementa saida iha sira nia suku,” Amaro akresenta.
Entretantu projetu husi PNDS tinan nee neebe atu implementa iha suku 62 ho valor orsamentu neebe preve liu milhaun US$ 2, neebe sei kobre ba operasional no infraestrutura nian.
(tom)
