DILI, STLTIMORLESTE.com – Deklarasaun husi nain ba emprenza importador kombustivel Esperanca Timor Oan (ETO), Nilton Gusmao, foin loron hirak liu ba nee garante katak stok mina iha Timor-Leste (TL) sei seguru ba fulan 4 oin mai, kria fali polemik foun. Akademista no observador sira kestiona makaas inkonsistensia entre liafuan garante nee ho realidade iha terenu, tanba presu iha bomba ka postu kombustivel sira sae kedas maski seidauk too semana ida.
Iha loron hirak liu ba ETO fo garantia katak, komunidade labele paniku tanba rezerva kombustivel nasional nian sufsiente tebes. maibe monitorizasaun iha postu abastezimentu sira iha kapital Dili hahu husi Segunda hatudu mudansa folin neebe signifikadu, husi US$ 1 too US$ 1.30 kada litru.
Akademista UNITAL, Ruivo Soares kestiona lojika husi kotuk iha desizaun nee. Tanba tuir nia, se stok neebe iha mak sosa ho folin tun (antes presu mundial sae), la iha razaun teknik ida hodi hasae presu iha tempu badak nia laran.
“Iha nee mak ita haree inkonsistensia nee. Se dehan stok garante ba fulan haat, nee katak produtu nee iha ona tanke laran. Se foin loron hira deit hasae ona presu, nee hatudu katak empreza la uza lojika ‘rezerva’,maibe uza deit oportunidade hodi buka lukru iha povu nia terus nia leten,”dehan Ruivo bainhira dada lia ho STL, iha Postu Kombustivel Hudi Lraran, Tersa (10/03/2026).
Nia mos kestiona kona-ba papel Estadu nian neebe Governu la dun iha poder, atu kontrola setor privadu iha area estratejika hanesan kombustivel.
Iha parte ketak Observador Politika, Mario de Araujo Mendonca konsideira inkonsistensia nee kria deskonfia boot husi konsumidor sira ba setor privadu neebe jere nesesisdade baziku hanesan kombustivel. Nia husu ba Governu, liu husi AIFAESA no Autoridade Nasional Petroleu (ANP), atu labele sai deit espetador ba jogu presu neebe empreza sira halo.
“Estadu tenke iha kbiit hodi kontrola. Labele husi emprenza sira kolia buat ida ohin, aban halo fali buat seluk neebe hasusar kbiit sosa povu nian.Presiza iha audita ba stock lenda nian hodi hatene lojika saida mak sira uza hodi hasae presu lalais hanesan nee,”hatete Mario.
(car)
