DILI, STLTIMORLESTE.com – Dezentralizasaun Munisipal neebe sei mai daudaun, husu ukun nain sira fo oportunidade ba ema hotu liu-liu feto hodi hola parte iha dezenolvimentu nasional.
Kestaun nee hatoo husi Diretora JSMP, Ana Paula Marcal ba jornalista STL iha Kaikoli, Kuarta nee (11/03/2026).
Nia hatete, feto ho mane iha direitu no obrigasaun hanesan no ohin loron feto barak mos iha kapasidade, tanba nee iha tinan mai hamosu dezentralizasaun munisipal fo mos oportunidade ba feto hodi hola parte.
“Feto ho mane igual, feto iha direitu hanesan mos ho mane, ita nia konstituisaun garantidu, tanba nee iha kualker pozisaun, kualker saida mak feto bele fornese ba dezenvolvimentu nasional, ita hotu tenke fo biban ba, labele dehan mane mak hakat liu, feto hakat badak lae, ita hotu hakat hanesan atu nunee kumpre ba konstituisaun,” dehan Diretora JSMP.
Iha biban nee Diretora JSMP husu mos ba lideransa sira nomos ukun nain sira neebe mak lidera hela nasaun kontinua fo biban fasilita feto sira, fo oportunidade atu nunee sira bele dezenvolve sira nia aan nunee partisipasaun hanesan mane sira.
“Ami lakohi rona dehan katak fornese pozisaun ida ba feto nee tanba kasian lae? Maibe ami tuur iha neeba tanba ami iha kapasidade duni, ida nee mak ami hakarak no ami bele, maibe durante nee ami hetan diskriminasaun ami hetan hakat neebe ladun luan, no hetan espasu no la fo oportunidade, ida nee mak halo buat barak labele dezenvolve aan kompete ho mane, maibe tuir lo-loos feto ho mane nee iha kapasidade hanesan, Maromak kria ami nee ita hotu feto ho mane iha kapasidade hanesan,” dehan Diretora JSMP.
Tanba nee nia husu ba ukun nain sira nafatin fo oportunidade ba feto, tanba feto barak mos iha kapasidade neebe mak hanesan ho mane.
Nunee mos Diretor Jeral husi Sekretariu Estadu ba Igualdade (SEI), Armando da Costa ba hatutan Konaba Dezetralizasaun Munisipal dadaun nee husi Parte SEI apoiu feto potensial iha nivel munisipiu halao tempu naruk ida mak liu asaun feto munisipiu establese iha 2014 too agora.
“SEI Apoiu feto potensial iha nivel Munisipiu halao tempu naruk ida mak liu husi asaun feto munisipiu establese iha 2014 too agora no kongresu ba dala tolu ida nee objetivu para atu bele kontribui ba preparasaun indentifika no prepara feto potensia sira iha nivel munisipiu hodi partisipa iha dezentralizasaun ita hahu kedas ona husi elisaun lideransa iha suku nia, no nasional sei establese programa hamutuk ho parseru sira mak hanesan 100% hau prontu depois mai fali faze segundu ita lansa fali programa feto prontu lidera agora dadaun ita serbisu hela ba revizaun programa ida nee konsidera nia iha plataforma feto iha politika nia SEI ho parseru sira iha prosesu revizaun atu hamosu fali planu estratejiku foun feto iha politika ba tinan 2026-2030 nia ita seidauk adopta nia mai ho naran saida,” dehan DJ SEI.
Nunee mos Prezidente Republika Jose Ramos Horta hatete bainhira koalia kona-ba Asaun, koalia konaba serbisu neebe tenke halo lor-loron. Dame maka direitu importante liu neebe maka estadu ida bele fo, no hatene katak dame loloos imposivel bainhira laiha inkluzaun no empoderamentu ba feto sira, Asaun signifika mos desmantela barreira pratika sira neebe maka impede feto no labarik-feto sira.
(eme)
