DILI, STLTIMORLESTE.com – Polisia Nasional Timor Leste (PNTL) Eskuadra Kristu Rei asegura ona inan husi bebe neebe abandona hela iha ICU Hospital Nasionál Guido Valadares (HNGV), iha loron Kuarta, tuku 06:00 OTL, inan nee rasik direita ba kedas HNGV nomos entrega aan ba polisia, maibe aman husi bebe seidauk identifika.
“Prosesu kontinuasaun husi horiseik buka tuir too ninia paradeiru hetan ona, entaun iha madrugada nee, inan nee rasik entrega nia aan, entaun liu husi parte husi hospitál hasoru kedas tiha ona ninia oan iha neeba, entaun kontinua hodi kedas nia mai iha eskuadra hodi kanaliza bebe nia ama agora ba iha VPU Munisípiu Dili para kontinua ba iha prosesu, kona-ba bebé nia aman nia parte la hatene tanba prosesu investigasaun iha VPU Munisípiu Dili,” hatete Komandante Eskuadra Kristu Rei, Inspetor Xefe Polísia Paulino de Carvalho ba jornalista sira iha nia knaar fatin Bekora, nee kuarta (11/03/2026).
Nia tenik, bebé nia inan nee entrega aan hafoin akompanha notísia neebe fo sai husi media sira.
“Nia voluntariamente entrega aan tanba nia mos horikalan akompanha notísia neebe ke ita publika nia mos akompanha hotu, entaun iha dadersan nee ita hetan ona nia paradeiru para bele foti kedas nia iha dadersan tuku neen (06) mai iha hospitál,” nia informa.
Nia esplika, kazu nee rasik prosesu iha hela identifikasaun, nunee bele hatene kona-ba konteúdu husi problema nee rasik.
“Prosesu hotu-hotu, primeiru ita halai ba identifikasaun ba iha neeba hodi hatene konteúdu nia problema oinsa mak too nia husik hela ninia oan rasik, entaun ho situasaun sira nee iha neeba parte VPU mak sei bele kanaliza iha Ministériu Públiku,” nia haktuir.
Nia deklara, kona-ba kauza husi kazu nee parte PNTL la envolve, maibe variedade husi nee Ministériu Públiku mak iha desizaun.
“Kauza ida nee so orsida iha desizaun Ministériu Públiku mak hatene klean liu, ita labele ko’alia ema nia privasidade, buat hotu-hotu segredu, entaun ida nee so Ministériu Publiku too iha tribunál mak hatene nia variedade, direitamente nia hatene ona saida mak nia halo nia hatene, nia konversa,” nia hatoo.
Enkuantu kazu nee rasik oras nee daudaun iha ona VPU Munisípiu Dili tanba, PNTL Eskuadra Kristu Rei entrega ona, depois hein nia kontinuasaun. Kona-ba halo detensaun ba bebé nia inan nee desizaun iha VPU, PNTL nia parte buka tuir de’it bebe nia inan.
“Ita atu halo detensaun nee orsida sira parte VPU, hau so esforsu hodi buka bebé nia mamá, saida mak horiseik hau koalia 24 oras de tempu mas la too 24 oras, tanba ho situasaun sira nee hotu ho ha’u nia esforsu tan deit bebe neebe iha hospital, agora paradeiru ninia inan agora iha ona ita-nia liman orsida ita-boot sira bele kontinua ba iha parte VPU hodi bele hetan klareza informasau ne’ebé detail iha VPU,” nia hatutun.
Entretantu informasaun neebe STL asesu iha HNGV katak, bebe feto neebe mak moris mai ho kondisaun hidrosefalus mediku sira konsidera kazu emerjensia no haree sinais vitais no aban sei halo ST-Scan ba bebe nia ulun.
(jen)
