DILI, STLTIMORLESTE.com – Prezidente Republika (PR), Jose Ramos Horta simu karta kredensia husi embaixadores nain sia (9) husi nasaun sia (9).
Iha serimonia ida neebe sublina Timor Leste nia empenamentu global neebe habelar liu tan, Prezidente Republika Jose Ramos Horta simu Karta Kredensia husi Embaixadores naun-rezidente husi nasaun 9.
Serimonia entrega kredensial nee marka inísiu ofisial ba misaun diplomatika husi Embaixadores neebe foin akreditadu ba Timor-Leste. Serimonia nee reforsa nasaun nia kompromisu atu promove kooperasaun internasional no harii ponte ho parseiru sira iha mundu tomak.
Embaixadores naun-rezidente sira neebe aprezenta sira-nia karta kredensial ba Xefe Estadu, reprezenta sira-nia nasaun mak Serob Bejanyan, Embaixador Estraordinariu no Plenipotensiariu, Republika Armenia nian, rezidente iha Jakarta Indonezia, Nicholas Panayiotou, Embaixador Estraordinariu no Plenipotensiariu Republika Cyprus nian, rezidente iha Jakarta Indonezia, Tornike Nozadre, Embaixador Estraordinariu no Plenipotensiariu Georgia nian, rezidente iha Jakarta Indonezia, Wilson Kipngetich Kogo, Embaixador Estraordinariu no Plenipotensiariu Republika Kenya nian, rezidente iha Canberra Australia. Bernadette Tobin, Embaixadora Estraordinaria no Plenipotensiaria Republika Malta nian, rezidente iha Roma Italia, Zahid Hafeez Chaudri, Embaixador Estraordinariu no Plenipotensiariu Republika Islamika Pakistaun nian, rezidente iha Jakarta Indonezia. Simon Wallace Namis, Embaixador Estraordinariu no Plenipotensiariu Papua Nova Guine nian, rezidente iha Jakarta Indonezia, Ivana Golubovic-Duboca, Embaixadora Estraordinaria no Plenipotensiaria Republika Serbia nian, rezidente iha Jakarta Indonezia, Bernardo de Sicart Escoda, Embaixador Estraordinariu no Plenipotensiariu Republika Espana nian, rezidente iha Jakarta Indonezia
.
Iha serimonia nee Prezidente Ramos Horta hatoo benvindu ho laran-kmanek ba diplomata sira mai Timor-Leste, hodi hatoo apresiasaun nasaun nian ba estabelesimentu formal ba sira-nia lasu diplomatiku. Prezidente hatoo nia kompromisu firme atu hametin liutan relasaun bilateral ho kada nasaun reprezentadu.
“Diversidade husi nasaun sira neebe halibur iha nee ohin husi ita-nia vizinu besik sira iha Azia-Pasífiku too parseiru sira iha Europa tomak, Mediu Oriente, no sira seluk—reflete natureza universal husi polítika esterna Timor-Leste nian,” afirma Prezidente Ramos-Horta bainhira simu karta kredensial iha Palasiu Prezidensial, Segunda (16/03/2026).
Xefe Estadu hatete Timor Leste hanesan nasaun kiik maibe fuan boot ba perspetiva Global. “Ami hanesan nasaun kiik ida ho fuan boot no perspetiva global. Ami hein atu serbisu besik ho imi ida-idak hodi harii parseria sira bazeia ba respeitu ba malu, prosperidade partilhada, no ami nia hakarak komun ba mundu ida neebe pasífiku no sustentavel,” dehan PR Horta.
Prezidente sublina importansia krítiku husi kolaborasaun internasional hodi hasoru dezafiu global sira no promove objetivu komun sira relasiona ho pas, seguransa, no dezenvolvimentu sustentavel.
Embaixador sira hatoo saudasaun kmanek no votus felisidades husi sira-nia Xefe Estadu no governu. Sira reafirma sira-nia dedikasaun atu haburas lasu amizade no esplora dalan foun ba kooperasaun ho Timor Leste.
Serimonia kredensial ida-nee destaka Timor-Leste nia perfil internasional neebe buras daudaun no espansaun kontinua ba ninia relasaun diplomatika sira dezde restaurasaun independensia iha tinan 2002.
(eme)
