BAUKAU, STLTIMORLESTE.com – Komando Polisia Munisipiu Baukau aplika alerta Um ba vizita ofisial Primeiru Ministru (PM) Kay Rala Xanana Gusmão nian durante loron rua iha Baukau.
Relasiona vizita ofisial Primeiru Ministru Kay Rala Xanana Gusmão ho komitiva ba programa “Haree besik servisu munisipal husi rezultadu avaliasaun ba kondisaun manima” iha Munisipiu Baukau neebe tuir planu sei halo iha loron 17 Marsu nee, Komando Polisia Munisipiu Baukau preparadu aplika alerta Um hahu iha loron 16-17 Marsu nee.
Komadante Komando Polisia Munisipiu Baukau, Superintendente Polisia João Sancho Pires esplika, alerta um durante loron rua nee, Komando Polisia Munisipiu Baukau ezekuta ordem servisu tuir lei organiku Polisia Nasional Timor Leste no Konstituisaun Republika Demokratika Timor Leste.
Tanba nee Komando Polisia Munisipiu Baukau husu Komadante Eskuadra Postu ualu ho nia membru sira iha Baukau atu servisu ho profesionalismu asegura situasaun durante vizita ofisial Primeiru Ministru nian iha Munisipiu Baukau, neebe hahu iha loron 16-17 Marsu nee.
“Alerta ba hotu hotu halo servisu ho profesionalismu asegura atividade neebe mak orsida too aban loron tomak iha Baukau ita asegura 100% kualker programa problema iha fatin Baukau,” Apela nee husi Komadante Komando Polisia Munisipiu Baukau, Superintendente Polisia João Sancho Pires iha Vila Nova Baukau, Segunda (16/03/2026).
Nia sublina, planu operasaun seguransa ba vizita refere, Komando Polisia Munisipiu Baukau koloka ona tuir ida idak nia sekasaun servisu, parte Polisia Tranzitu sei asegura movimentasaun transporte publiku no privadu sira no seksaun taskfors sei halao patrolhu masimu liu tan iha ambitu vizita ofisial refere hodi haree situasaun seguransa durante vizita Xefe Governu ho nia komitiva iha Baukau.
Tanba nee husu ba entidades hotu iha Munisipiu Baukau atu nafatin apoiu servisu seguransa nian liu liu labele tur estrada iha tempu kalan, maibe hamamuk estrada iha tempu kalan hodi garante pas no estabilidade iha Baukau durante vizita Xefe Governu nian no ba asuntu seluk tan.
“Laos tan PM mai, maibe oras ida neebe deskansa nian fila ba uma, se mak tur iha dalan Polisia iha dever fo hanoin ba sira fila ba uma deskansa hodi labele hamosu problema, se hamosu problema Polisia iha dever atu asegura,” Komando Polisia Munisipiu Baukau, Superintendente Polisia João Sancho Pires apela.
Entretantu tuir observasaun STL nian iha terrenu nota katak, Autoridade Sivil no Militar halao ona preparasaun masimu atu simu vizita ofisial husi Xefe Governu Kay Rala Xanana Gusmão ho nia komitiva iha Munisipiu Baukau.
(tom)
