BAUKAU, STLTIMORLESTE.com – Komando Polisia Munisipiu Baukau identifika ona joven nain 8 ba kazu sunu baraka rua (2) no estragus sasan seluk tan iha Suku Uailili, Postu Administrativu Baukau Vila, Munisipiu Baukau.
Kazu nee akontese iha semana kotuk, kauza husi jogu bola voli iha suku Uailili mosu akontesementu baku malu entre joven sira no Ofisial Polisia Suku (OPS) halo ona atuasaun, maibe kontinua halo asaun atake malu rezulta uma baraka rua hetan sunu no ida estragus, seluk mak motor Honda marka verza ida hetan estragus kauza utiliza arma branka inklui animal manu ida mate tanba kauza husi insediu.
“Kazu Uailili nee prosesu identifikasaun lao hela identifika ona suspeitu nain 8 investigasaun bolu sira mai iha nee ita kontinua lao hela haree hela prosesu nee,” Komadante Komando Polisia Munisipiu Baukau, Superintendente Polisia João Sancho Pires informa ba STL iha Vila Nova Baukau, Segunda (16/03/2026).
Nia komenta, hafoin akontese kazu refere Komando Polisia servisu hamutuk ho entidades sira bolu kedas sidadaun mane idade jovem 8 ba kazu refere.
Jovem nain 8 refere Komadante Komando Polisia Munisipiu Baukau la temi nia inisia, maibe aprezenta ona ba Ministeriu Publiku atu prosesa tuir dalan legal.
“Prosesu lao hela nia kanal ita ba Ministeriu Publiku, ita nafatin halo prevensaun ba buat sira nee para labele mosu tan,” Superintendente Polisia João Sancho Pires argumentu.
(tom)
