DILI, STLTIMORLESTE.com – Ministru Justisa (MJ) halo abertura ba serimonia VIII kursu formasaun inisial ba iha kareira Juiz, Prokurador no Defensor Publiku hamutuk nain 36.
“Ohin ita hahu ho inisiu formasaun ba Majistradus Juiz, Prokurador no Defensor Publiku hamutuk 36, formasaun nee nuudar politiku Nuno Governu Konstituisional nian,” dehan Ministru da Justisa Sergio Hornai, hafoin halo abertura ba VIII formasaun iha Kaikoli, Segunda (16/03/2026).
MJ hatutan, depois haree ba iha programa Governu nian oinsa mak atu halo reforsa ba iha kuadru pesoal sira, iha Tribunal Prokurador no Defensoria Publika atu hatan kona-ba alargamentu sira neebe sei halao ba iha Munisipiu sira.
Nia sublina, estabelese Supremu Tribunal Justisa (STJ) atu bele hasai Juiz sira neebe oras nee daudaun halao hela sira nia funsaun hanesan Juiz iha terseira klase, Segunda klase no Primera klase ba iha Tribunal Superior.
Informa tan, iha vaga tanba nee bele prense dadaun ona, kuadru ka forsa traballu iha futuru. No formasaun ida nee hanesan formasaun inisial neebe Governu inisia, atu kontribui diak liu tan ba kuadru ida neebe sufisiente, hodi hatan ba prekupasaum boot, ezijensia demanda neebe mai husi komunidade sira neebe loron ba loron buka justisa.
Sergio akresenta, publiku hakarak justisa ida nee ho lalais, no ho lolos, tanba nee prepara rekursu umanus atu fo solusaun ida neebe diak, tenke iha kuadru iha neebe ho kualifikasaun aas, ho formasaun no tekniku ida neebe diak atu eleva kualidade.
Iha fatin hanesan, Direktor Sentru Formasaun Juridiku no Judisiariu, Fransisco Xavier Basco Soares dehan, formasaun neebe sei halao ho nia durasaun durante tinan tolu.
“Formasaun ohin halo abertura aban ita komesa ona, formasaun dura tinan tolu, formasaun inisial faze teoria fulan sanulu resin walu, iha faze pratika fulan neen, depois maka foin pasa ba iha faze estajiu,” dehan nia.
Hatutan tan, se mak liu ona ba iha faze estajiu, Prokurador nian sei halao estajiu ba iha Ministeriu Publiku, Juiz sei ba iha Tribunal, no Defenor sira sei ba iha Defensoria Publiku, durasaun ba estajiu durante tinan ida.
Informa, formados ba iha Juiz nain 14, Ministeriu Publiku 22 no iha Defensor Publiku nian 10, no formador nain 10, lingua Portuguesa nain haat, tetum juridiku nain ida, no formasaun ba direitu nian nain 5, maibe agora ejiste iha nain tolu deit, tanba nee sei rektura tan ida iha Portugal hanesan Prokuradora sei mai iha fulan Junu.
Esplika tan, materia importante sei fahe ba iha parte rua, ida materia nukleares ezemplu, direitu penal, direitu prosesual penal, direitu sivil, direitu prosesual sivil. Iha mos material komplementar ezemplu, direitu konstituisional, direitu adminstrativu, direitu de trabalu.
Akresenta, ho numeru nee bele aumenta tan rekursu umanu ba iha Tribunal, MP no Defensoria Publika tanba numeru agora sei menus. Sei alarga tan Tribunal iha Munisipiu, no sei instala Supremu Tribunal Justisa, prepara ona rekursu umanus atu prense ba iha fatin sira nee.
Tuir observasaun, marka prejensa iha abertura nee, Prokurador Jeral da Republika, Prezidente Tribunal Rekursu, Direktor PSIK, Direktor Sentru Formasaun Juridiku no Judisiariu, formados, no formador sira.
(ter)
