DILI, STLTIMORLESTE.com – Antes nee Ministeriu Publiku bolu Mari Alkatiri hodi presta deklarasaun iha Ministeriu Publiku (MP), tanba nee Prokurador Jeral Republika deklara, Prokurador titular mak bolu.
“Hau labele hatene ida nee, nee kestaun kada Prokurador titular bolu nia intervenente sira ida nee poder tomak iha Prokurador titular,” dehan Prokurador Jeral Republika, Nelson de Carvalho ba jornalista sira iha Kaikoli, Segunda (16/03/2026).
Informa tan, nia la hatene Prokurador titular sira bolu tanba saida, maibe Prokurador kuandu bolu ema ida sempre sai hanesan arguidu, testemunha no lezadu, maibe too agora nia parte seidauk hetan relatoriu ida katak, Senhora Mari atu sai hanesan saida seidauk hatene.
Hatan konaba kazu Ro Haksolok nia parte dehan, prosesu ida nee kompleksu.
“Kazu ida nee kompleksidade oituan, neebe investigasaun tenke klean, no iha hela investigasaun nia laran,” dehan PJR.
Hatutan, instituisaun sira neebe konjugadu ho Ministeriu Publiku sempre servisu hamutuk hodi haree konaba kazu nee.
Informa tan, konaba prosesu Diretor Serve nia nebee KAK haruka ona ba iha MP, prosesu nee rejista ona no Prokurador titular mak toma konta hela kona-ba ida nee.
Akresenta tan, kona-ba prosesu jogu online iha hela investigasaun nia laran.
“Prosesu nee iha hela investigasaun nia laran, seidauk konklui investigasaun,” dehan nia.
Hatutan, kuandu iha ona akuzasaun lori ona ba iha Tribunal bele dehan konklui ona, maibe agora sei iha faze investigasaun nia laran.
Iha fatin ketak, Akademiku UNTL, Sebastião dos Santos dehan, Prokurador tenke halo investigasaun ho klean, ba prosesu sira neebe liga ho preokupasaun sosiedade nian.
“Hau hanoin presiza halo investigasaun klean, konklui nia investigasaun atu labele hamosu polemika iha sosiedade nia leet,” dehan nia.
Informa tan, Prokurador hanesan nain ba iha prosesu, tanba nee tenke halo knaar ho los, investiga prosesu sira nee ho diak atu bele konklui lalais nia investigasaun.
(ter)
