DILI, STLTIMORLESTE.com – Relasiona ho Governu lansa programa infraestrutura reabilitasaun estrada, vistu previa husi Tribunal emite ba empreza hodi halao servisu ba reabilitasaun estrada, PTR deklara iha pedidu barak, no Ermera nia hetan vistu ona.
“Hau hanoin vistu previa liga ho pedidu neebe tama, hau hanoin barak balu aseita tiha ona hanesan Ermera nian nee, no sira seluk sei prosesu,” dehan Prezidente Tribunal Rekursu, Afonso Carmona, ba Jornalista sira iha Kaikoli, Segunda (16/03/2026).
Nia hatutan, ida nee liga ho dokumentus sira, laos pedidu tama ba dekreta kedan, maibe sei haree nia orsamentu liga ho planeamentu no programa sira.
Esplika tan, PTR seidauk hatene hira mak dekreta ona, foin orienta ba iha seksaun de kontas atu sira bele relata kona-ba rezutadu ida nee.
Carmona dehan, nia parte la direita kaer, maibe hanesan PTR tenke hetan relata fali husi sira nia seksaun kada fulan konaba atividade sira nee.
Akresenta tan, sira seidauk relata, tanba nee nia parte seidauk fo hatene lo-loos kona-ba numeru hira, maibe kona-ba estrada Ermera nian hetan vistu ona, sira seluk sei prosesu.
Iha fatin ketak, Akademiku UNTL, Rafael de Jesus dehan, importante duni Tribunal fo vistu mak foin reabilita estrada, hodi nunee tuir kontratu neebe iha.
“Prosesu sira hanesan nee tenke hetan vistu husi Tribunal, hodi haree liu ba montante orsamentu atu kompanhia bele halao servisu ho diak,” dehan nia.
Hatutan tan, estrada sai hanesan parte importante duni, tanba nee tenke hadia atu fasilita komunidade sira nia movimentu.
(ter)
