DILI, STLTIMORLESTE.com – Deputada Bankada Partidu Kongresu Nasional Rekunstrusaun Timor (CNRT), Virgina Ana Belo ho matan been husu Governu atu salva lalais labarik sira neebe oras nee halo tratamentu iha Hospital Nasional Guido Valadares (HNGV) tanba atendimentu la diak.
Deputada Virgina hatete, Governu presiza halo intervensaun lalais ba atendimentu ba pasiente sira liu-liu labarik sira neebe oras nee halo tratamentu iha sala kuidadu intensivu, tanba kada loron mate beibeik.
Nia dehan, iha tinan 2024 ninia subrinhu ho idade 18 moras, no doutor sira rekomenda atu ba halo tratamentu iha Hospital Malazia, no sira lori pasiente nee too Aeroportu Internasional Prezidente Nicolao Lobato, maibe simu fali informasaun katak doutor neebe atu halo atendimentu sei ferias tan nee labele halo atendimentu ba pasiente nee iha Malazia.
Tan nee, familia sira deside lori ona fila pasiente nee ba halo tratamentu saude iha Hospital Nasional Guidu Valadares (HNGV) maibe liu loron tolu labarik nee mate.
Tanba nee, ho matan been nia husu ba Governu atu foti lalais intervensaun liu-liu hadia prosesu atendimentu nunee bele salva pasiente sira liu-liu labarik sira neebe halao tratamentu iha sala kuidadu intensivu
“Por favor hau husu governu atensaun ba ida nee, tanba ida nee hau haree rasik ho matan, labarik sira mate, akontese ba hau nia bei oan, mate iha hau nia mata laran, tanba la iha atendimentu, hau nia laran moras tebe-tebes hau haree atendimentu ida nee,” hatete deputada Virgina Ana Belo liu husi plenaria Parlamentu Nasional, Segunda (16/03/2026)
Nia hatutan, prosesu atendimentu iha hospital sira lao ladun diak, laos akontese deit iha tinan 2024 maibe akontese mos iha tinan 2026 nee, tanba iha semana kotuk nia lakon bei oan rasik tanba atendimentu la diak.
“Foin akontese tan iha semana kotuk, hau nia bei oan ho idade tinan 8 , depois moras lori ba hospital dehan moras iha nia ulun, depois dehan moras nee mai fali iha ninia pulmaun no depois dehan moras oin-oin seluk tan too nia lakon nia vida iha sala de kuidadu intensivu, laos nia deit maibe iha sala nee labarik nain haat too nain lima mate tutuir malu deit,” dehan nia.
Iha fatin hanesan, Deputadu Bankada FRETELIN, David Dias Ximenes “Mandati” hatete, sekunda preokupasaun Deputada Virgina Anabelo nian kona-ba problema iha setor saude neebe too oras nee governu seidauk rezolve ida.
“Ema balun familia mate iha neeba ema foti problema lori ba fatin sira neebe atu hetan justisa, justisa mos la halo buat ida, neebe akontese primeiru ohin ita nia deputada nee foti problema,” dehan nia.
Mandati dehan, problema neebe akontese iha HNGV tanba governu liu husi Ministeriu Saude hasai no substitui profisional saude sira, entaun prezudika ba hospital la iha kualidade
“Agora ita nia hospital hasai ema, substitui ema arbitrariamente atraves iha deit fulan ida fulan rua troka dala rua dala tolu kedas, ida nee mak halo ita nia hospital neeba nee bele ema barak maibe kualidade la iha, ita nia espesialista agora iha hotu tiha liur ba halo hotu sira nia klinika privadu sira, ida nee mak halo ita nia maluk sira barak ba lakon ninia familia,” nia aprofunda.
Hatan ba Preokupasaun nee, Vise Ministru asuntu parlamentar, Aderito Hugo da Costa preokupa tebes deklarasaun husi deputada Virgina Ana Belo kona ba prosesu atendimentu pasiente liu-liu labarik sira iha Hospital Nasional Guido Valadares.
Tanba nee nia husu Ministra Saude ho nia Vise Ministru Saude nain rua bele haree no fo resposta no atuasaun imediata iha terrenu nee para hapara ou haree oinsa implementasaun atendimentu saude nian iha ita nia setor saude,” nia afirma.
“Lamentavel tebe-tebes saida mak deputada foti akontese, hau fiar katak ida nee akontese duni, deputada espresa ho sentimentu triste no todan hanesan familia no hanesan Inan ba akontesementu nee, hau senti situasaun sira hanesan nee akontese mos ba sira seluk mesmu sira la iha espasu hanesan ohin Deputada Virginia espresa iha nee ba ema hotu bele haree no rona,” hatan Vise Ministru Asuntu Parlamentares.
(alb)
