DILI, STLTIMORLESTE.com – Relasiona ho menus kampu trabalhu iha rai laran, mak oinsa governu kria kampu servisu hodi bele absolve graduadus neebe remata iha universidade.
Reitor Instituto Ciensia Saude (ICS), Leao Borges hatete, los duni katak kampu trabalhu menus iha rai laran, nunee mos universidade sira kada tinan prepara graduadus neebe remata sira nian estudu, agora governu mak tenke iha planu hodi loke kampu trabalhu ba joven sira nee, tanba husi universidade prepara ona graduadus.
“Ita husu ba governu para bele kria kampu trabalhu, ho nunee ita nian graduadus hirak neebe mak kada tinan universidade sira produs nee bele hetan servisu, atu nunee labele kria konflitu iha komunidade nia let. Bainira konflitu nee mosu iha rai laran, tanba kampu trabalhu nee laiha, ema la hetan servisu entaun bele hamosu konflitu sira nee iha ita nia rai,” dehan Reitor Instituto Ciensia Saude (ICS), Leao Borges ba STL iha nia knar fatin ICS, Tersa nee (17/03/2026).
Nunee mos Reitor East Timor Coffee Institute ( ETCI), Mateus Maia de Jesus hatete, kada tinan universidade iha TL produs ona graduadus neebe remata sira nian estudu, maibe oinsa mak graduadus sira bele kria servisu ba sira nian aan rasik.
“Ita produs Rekursu Umanu laos bazeia ba kampu trabalhu neebe mak ita iha, tanba kampu trabalhu nee hanesan buat ketak ida, maibe produs rekursu umanu nee sai baze importante ba ema idak-idak, agora depende ba ema idak-idak oinsa mak atu kria servisu, laos ita produs ema atu ba buka servisu deit, maibe ita produs ema oinsa kria srvisu ba ninia aan rasik,” nia kementa.
Nia dehan, oinsa mak graduadus idak-idak bele kria servisu ba aan rasik, edukasaun nee atu halo saida, nee duni sira idak-idak bele kria kampu trabalhu ba sira nia aan, los duni katak tinan-tinan ensinu superior produs Rekursu Umanu iha TL, maibe sira ida-idak bele servisu ba sira nian aan no labele hein deit buka servisu.
Iha fatin seluk, Direitor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
“Los duni too agora ita nian graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur,” nia afirma.
Nunee mos Reitor ISC, Sebastiao Perreia dehan, universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun.
(jac)
