DILI, STLTIMORLESTE.com – Korpu Diplomatiku neebe akreditada iha Timor Leste sei hametin lasu amizade entre Timor Leste ho nasaun neebe Embaixador sira haknaar aan ba.
Prezidente Republika Jose Ramos Horta liu husi diskursu iha Okaziaun Resepsaun Anual ba Korpu Diplomatiku neebe akreditadu iha Timor Leste. Tema Reforsa Amizade: Kultura, Natureza no Diplomasia iha Palasiu Lahane, Segunda kalan (16/03/2026) hatete, ho ksolok tebes Prezidente fo benvindu embaixadores sira hotu iha resepsaun anual ida nee neebe dedika ba Korpu Diplomatiku akreditadu ba Republika Demokratika Timor Leste.
“Hau hatoo hau-nia kaloroza saudasaun ba Embaixador sira hotu, ba sira-nia kaben, ba sira neebe hela iha Timor-Leste no ba Xefe Misaun naun-rezidente sira neebe halo viajen mai Díli husi kapital sira ita-nia rejiaun nian no rejiaun sira seluk Jakarta, Singapura, Kuala Lumpur, Canberra no Roma. Ita-boot sira-nia prezensa fo onra ba ami no hametin lasu amizade entre Timor-Leste no povu sira neebe ita-boot sira reprezenta. Okaziaun ida-nee konstitui momentu privilejiadu ida ba reflesaun no renovasaun ba ita-nia kompromisu komun ba kooperasaun internasional, dame no entendimentu entre povu sira,” dehan PR Horta.
Iha biban nee Prezidente Republika hatoo apresiasaun klean ba servisu misaun diplomatika no organizasaun internasional sira neebe reprezenta TL.
“Ita-boot sira-nia empenu loron-loron fortalese relasaun amizade entre Timor Leste no komunidade internasional no kontribui ba progresu neebe ita hotu aspira atu alkansa. Kona-ba Tema Resepsaun: Kultura, Natureza no Diplomasia Tinan ida-nee, ita-nia resepsaun diplomatika hetan inspirasaun hosi tema “Reforsa Amizade Kultura, Natureza no Diplomasia. Tema ida-nee reflete dimensaun fundamental tolu kona-ba identidade timor-oan nian no ita-nia vizaun mundial: Primeiru, kultura, klamar povu ida nian no baze ba entendimentu entre sivilizasaun sira. Segundu, natureza, neebe nia prezervasaun esensial ba futuru komun umanidade nian. Terseiru, diplomasia, instrumentu fundamental atu harii ponte entre nasaun sira, rezolve diferensa sira no promove bem-komun,” dehan PR Horta.
Xefe Estadu hatete, Timor Leste Ohin Loron, Estabilidade, Demokrasia no Dezenvolvimentu moris iha kontestu estabilidade polítika, armonia sosial no koezistensia pasífika entre komunidade sira ho orijen kultural, linguístika no relijioza oioin.
“Iha mundu ida neebe marka ho tensaun no divizaun identidade nian, ami orgullu atu afirma katak ami laiha violensia polítika, konflitu etniku sira ka tensaun relijioza sira. Ami-nia país kontinua sai espasu konvivensia pasífika no respeitu ba malu. Ami-nia instituisaun demokratika sira kontinua konsolida-an. Pluralizmu polítiku, liberdade imprensa no respeitu ba direitus umanus sai nafatin pilar esensial ba ami-nia vida publika,” Katak Horta.
(eme)
