ATAURO, STLTIMORLESTE.com – Korpu diplomatiki neebe akreditada iha Timor Leste vizita ilha Atauro, hodi promove ilha Timor Leste ba Mundu Internasional.
Iha biban nee Adjunta Xefe Kaza Sivil Prezidensia Republika, Henriqueta Maria da Silva ba jornalista iha Beloi Atauro, Tersa nee (17/03/2026) hatete, ohin lori korpu dipolimatiku sira mai vizita ilha Atauro, vizita ida nee hodi bele promove Ilha Timor Leste ba Mundu Internasional.
“Objetivu Ita lori embaixador sira mai iha nee, atu promove ita nia fatin turizmu liu-liu illa Atauro ba ema Internasional liu-liu embaixador sira tanba sira sira embaixador kada nasaun sirabarak neebe mai barak liu embauxador naun, Entaun sira mai sira sei sai mos promotor ka ema neebe sei halo promosaun ba ita nia illa diak hanesan Atauro, neebe ho nia natureza no Paisajen neebe mak furak iha tan klima ida neebe diak, tanba iha hela fulan marsu entaun nee momentu ida neebe ita atu halo promosaun,” katak Adjunta .
Adjunta hatete, sira mai atu promove Ilha TL no tasi sira ho nia koral sira mai haree mos produtu lokal iha Atauru.
Adjunta Xefe Kaza Sivil hatete, ohin sira haree tradisaun sira neebe aprezenta ba sira, tradisaun simples kaer liman dansa hamutuk nee katak nee promove katak maske Timor Leste rai kiik maibe hatene simu ema no hadomi ema ho unidade kaer liman tebe hamutuk iha momentu neebe saudavel ho kontente ida nee ezemplu neebe hatudu katak Timor hadomi dame hadomi pas.
Adjunta hatete embaixador neebe mak vizita Ilha Atauru hamutuk 17 pesoas maioria husi nasaun naun rezidente.
“Embaixador hamutuk 17 pesoas husi nasaun barak,” katak Adjunta.
Nunee mos Administrador Posto Administrativu Atauru Mateus Belo hatutan Hatete sente preveleiju boot ho vizita husi Embaixadores sira mai iha Ilha Atauru.
“Sente Preveleiho ho vizita ida nee, nee signikante tebes ba atauru tanba atauru sai fatin destinatoriu no laos tanba bainaka mai maibe kuaze Fim do mes fim do semana sempre hetan vizita husi ema estranjeiru sira no turista sira barak tebes mak mai,” dehan Administrador.
Nia hatete ho vizita ida nee husi Korpu Dipplomatiko sira husi rai liur ida nee importante los bele promove Ilha Atauru iha Mundu Internasional.
Aleinde nee Prezidente Republika Jose Ramos Horta hatete Natureza, Oseanu no Ekonomia Azul, Timor-Leste mos país ida neebe iha rikusoin natural neebe estraordinaria. Illa Atauro, neebe lokaliza iha largu Díli nian, iha ekosistema marinu nian ida neebe ho biodiversidade boot iha planeta, ho diversidade hosi espesie ikan resife nian neebe konsidera entre aas liu neebe rejista ona.
“Patrimoniu natural ida-nee iha importansia sentral ba ami-nia estratejia ekonomia azul, neebe inklui dezenvolvimentu sustentavel ba peskas, ba turizmu ba mariñu responsavel, ba akuakultura no ba konservasaun ambiental. Ami-nia objetivu klaru atu promove kreximentu ekonomiku sein kompromete ekosistema sira neebe sustenta ami-nia moris no ami-nia future,” dehan PR Horta.
Tuir Atauru observasaun neebe mak STL hetan bainhira embaixador sira too iha Porto Beloi lia nain komunidade sira simu ho kultura Atauru nia, no komunidade sira hamutuk ho embaixadores sira tebes hodi hatudu dame ba malu.
(eme)
