ATAURO, STLTIMORLESTE.com – Prezidensia Republika (PR) servisu hamutuk ho Governu, ajensia turizmu sira iha Timor Leste, inklui APORTIL oferese Roo Nakroma Berlin Ramelau espesial ba embaxador nain 17 husi nasaun 17 vizita ilha Atauro.
Husi embaixador nain 17 nia vizita ida nee sei promove Timor liu-liu ilha Atauro ida nee ba iha fatin hotu-hotu liu-liu ba sira nia rain, bele atarai turista sira iha futuru vizita Timor Leste.
Iha biban nee, Reprezentante Prezidente Republika, Xefe Kaza Sivil Prezidensia Republika, Henriqueta Maria da Silva ba jornalista iha Beloi Atauru tersa 17/03/2026 hetete delegasaun embaixador sira nee sai husi Dili oras tuku 08:20 too iha Portu Atauro oras 10:40 lia nain sira simu ho tradisaun, kultura no lia dadoli husi kultura Atauro nian.
Reprezentante Prezidente Republika, Xefe Kaza Sivil Prezidensia Republika, Henriqueta Maria da Silva hatete, nee servisu konjunta, maske inisitiva Prezidente Republika nian, resesaun diplomatiku nee anual, maibe resesaun diplomatika Estadu.
“Entaun ita servisu hamutuk ho governu, servisu hamutuk mos ho ajensia Turizmu sira iha Timor-Leste, ho parte hotu-hotu inklui Aportil kolabora loos oferese ro Nakroma Berlin Ramelau, konserteja ita tenke aula uitoan, nunee fo mos rendimentu ruma ba sira. Ita boot sira ohin akompana sira mai ita lori sira hanesan turista, lori sira hanesan diplomata sira mai, sira bele fo mos osan ruma ba ita nia komunidade hahu kedas iha ro laran rendimentu ruma. Entaun ita fila fali mak oferese kokotel maibe bainhira sira mai, sira livre iha Atauro, sosa saida deit iha Atauro, fo mos rendimentu ba komunidade Atauro,” dehan Xefe Kaza Sivil Prezidensia Republika.
Xefe Kaza Sivil hatete, maske orsamentu mai husi Prezidensia Republika mais nee Prezidensia Republika konsidera hanesan despeza estadu.
Nia mos akrezenta tan katak, orsamentu hira mak aluga ba roo nee ladun lembra orsamentu hira, mais la presiza dehan iha nee, maibe gasta uitoan mais benefisiu boot katak sira fila sira sei promove iha ida-idak nia nasaun kona-ba illa Atauro.
“Vizita ida nee mai hanesan sira Embaixador entaun sira automatikamente sira mai vizita sira sei sai mos ema neebe sei promove Timor liu-liu illa Atauro ida nee ba iha fatin hotu-hotu ba iha sira nia rain, ita bele atarai turista sira iha futuru mai iha ita nia rain,” nia hatete.
Nia esplika, objetivu Prezidensia Republika lori Embaxador sira mai iha Atauro atu promove illa Atauro ba ema internasional sira liu-liu Embaxador sira, tanba sira sai hanesan Embaxador kada nasaun ida.
Iha fatin hanesan, Prezidente Autoridade Atauro, Mateus Belo hatete, primeiru preveleju boot ho vizita Embaixador sira nia vizita ida nee signifikante tebe-tebes ba Atauro sai hanesan fatin distinatoriu turistiku laos deit Embaxador sira nee deita mak mai. Maibe tanba kuaze fim semana, vizita bainaka estranjeiru sira, turista sira barak tebe-tebes.
“Maibe ho vizita ida nee liu-liu ba ita nia membru korpu diplomatiku mai husi rai liur, hau hanoin ida nee importante loos nunee bele promove atividade turizmu iha Atauro ba mundu seluk ka nasaun seluk,” nia haktuir.
Nia haktuir, hanesan informasaun neebe ami simu, primeiru ba luku tasi tanba Atauro konesidu iha rekursu tasi neebe riku tebe-tebes iha mundu. Tanba faze parte iha nasaun sira neebe konsidera iha rekursu tasi hanesan ahu ruin ba tasi ikan oi-oin, neebe kuaze ema gosta mai luku iha Atauro.
“Ita iha sítiu turistiku patrimoniu istoriku hanesan kadeia antigu, monumentu desteradu uma antigu postu neebe vizitante sira mai sempre ba vizita,” nia hatutan.
Nia hatutan, ho lia grupu komunidade sira, neebe halao atividade hanesan boneka, artezenatu sira, homan sira bele promove hanesan identidade Atauro nian. iha paisajen furak hanesan Akrema sai sítiu turistiku Atauro nian maibe nee dook tebe-tebes bainaka sira labele too.
Maibe fatin neebe luku tasi furak liu mak iha Portu nian oin kedas sira bele ba asiste. Hanesan mos stand sira nee ekipamentu ba husi operador turizmu sira, promove produtu Atauro artezenatu, homan ho mos ai-han tradisional hakarak promove ai-han neebe saudavel produtu lokal rasik.
Nunee mos Embaixador Portugal iha Timor-Leste, Duarte Alves hatutan agora nia vizita dala rua mai Atauro, vizita dahuluk mai iha Atauro hanesan turista, hodi halo luku tasi, maibe agora atividade ida nee organiza husi Gabinete Kaza Sivil Prezidensia Republika, hanesan oportunidade ida mai atu deskobre liu tan, potensial husi illa nee.
“Hau vizita Villa Maumeta, hau vizita eskola KAFE, hau vizita kadeia antigu, no mos balkaun uniku. Alende ida nee hau no vizita bobeka Atauro, ida nee oportunidade ida haree besik liu tan illa nee no mos nia potensia ekonomia lokal, artezenatu lokal, no prezensa Portugal nian iha illa Atauro. Dezde hau mai iha Timor Setembru 2025, hau iha programa barak neebe halo fora husi Dili, hodi konese munisípiu sira seluk no ohin iha Atauro. Komunidade nee izolada tanba parte ida husi illa neebe dook husi Dili, komunidade iha nee votande boot, no fuan nakloke hodi simu turista sira no mos hodi fahe sira nia esperiensia moris,” dehan Embaixador Portugal mai TL.
Embaixador dehan nia vizita bobeka Atauro, feto sira iha potensial boot tebes, dezenvolve sira nia artezenatu neebe agora sai konesidu tebes iha artezenatu Timor-Leste nian.
Importante tebes tanba Gabinete Prezidensia Kaza Sivil organiza resesaun diplomatika anual neebe fora husi Dili, liu-liu ba Embaixador naun rezidente sira, atu konese diak liu nasaun Timor Leste.
“Mensajen mak nee hanesan horsehik Prezidente Republika nia diskursu iha resesaun diplomatika mak diversidade, riku, no iha biodiversidade ba mundu. Iha Outubru hau mai luku tasi iha Atauro iha paisajen furak tebes, se bele hatoo mensajen ida hanesan ita boot sira nia pergunta hodi hatoo ba populasaun no autoridade Atauro buat neebe hau hakarak husu mai kuidadu biodiversidade, prezerva natureza, labele estraga no labele halo foer, no labele distrui tanba ida nee mak natureza uniku iha mundu,” katak nia.
Nia hatutan Tuir sientista biolojika sira iha mundu hatete, Atauro illa neebe riku ho biodiversidade, iha potensial boot atu atrai turista, se nia bele hili mensajen ida mak prezerva ekositema.
(eme)
