BAUKAU, STLTIMORLESTE.com – Kombatentes neebe rejistu iha tinan 2003, 2005 no tinan 2009 ba segundu faze atu simu direitu osan iha loron 29 Abril tinan nee, husi Munisipiu Baukau hamutuk nain 321.
Sekretariu Jeral Konselhu Munisipal Kombatentes Libertasaun Nasional (CMCLN-sigla português) Baukau, Roberto Carlos da Costa “Laran Tarido” esplika, kombatentes husi Munisipiu Baukau neebe atu simu nia direitu iha loron 29 Abril nee aprovadu husi Ministeriu Asuntu Kombatentes Libertasaun Nasional (MACLN-sigla português) laos husi kombatentes hirak neebe iha tinan kotuk halo kontestasaun no reklamasaun, maibe husi kombatentes neebe antes nee halo rekerementu atu asesu ba direitu pensaun ho osan husi Estadu Timor-Leste.
“Sira 321 nee balu iha martire i barak liu mak kategoria prestasaun pekunaria unika direitu ba 3A7, bazeia ba kalendariu neebe Ministeriu rasik hatun mai neebe aprovadu 321 nee ba Baukau fixa iha 29 de Abril,” Sekretariu Jeral CMCLN Baukau, Roberto Carlos da Costa “Laran Tarido” informa ba STL iha nia knaar fatin Vila Antiga Baukau, Kuarta (18/03/2026).
Nia sublina, loron fixu ba kombatentes nain 321 husi Munisipiu Baukau neebe atu simu direitu osan husi Estadu Timor-Leste mak sei hahu iha loron 29 Abril tinan nee, tanba nee iha loron refere kombatentes sira tenke marka prezensa iha edifisiu Konselhu Kombatentes Libertasaun Nasional (CCLN-sigla português) Dili no MACLN Dili hodi foti fixa pagamentu hafoin ba Banku indentifikadu hodi simu direitu pensaun.
Tanba nee husu kombatentes neebe naran taka sai iha lista segundu volta nee hotu hotu prezensa iha loron refere hodi hetan direitu pensaun husi Governu neebe rekonhese husi Estadu Timor Leste.
Maibe husu mos ba kombatentes sira neebe halo konstestasaun iha tinan kotuk no submete ona dokumentus ba MACLN liu husi CMCLN Baukau atu nafatin hein prosesu tuir mai.
“Agora nee Ministeiru sei haree ba sira neebe aseita halo uluk pagamentu depois mak Ministeriu haree fila fali sira neebe foin daudauk halao reklamasaun 2009 nian no sira neebe halao reklamasaun no kontestasaun 2003 nian,” Laran Tarido informa.
Iha fatin hanesan, responsavel Keixa toni masin fatuk, Feliciano de Sousa Gama “Asukai Wasege” la satisfas ho lista kombatentes neebe taka sai atu simu pensaun iha loron 29 Abril nee, tanba kombatentes husi kaixa toni masin fatuk hamutuk nain 24 halo ona rekerementu, maibe balu naran la iha atu simu direitu pensaun.
“Ita husu ba Estadu RDTL ida nee hadia prosesu sira nee para sira uluk basa hirus matan hasoru invazor kontente oituan ba, agora hau haree naran balu laiha, tanba nee hau nuudar responsabilidade triste oituan,” Feliciano katak.
Responsavel keixa toni masin fatuk nee sente triste ho lista neebe iha, tanba kombatentes barak mak Estadu Timor-Leste seidauk fo rekonhesementu, nunee husi atu aselera prosesu sira hodi atribui lalais direitu pensaun ba kombatentes sira.
Entretantu naran kombatentes 321 neebe taka sai iha edifisiu Konselhu Munisipal Kombatentes Libertasaun Nasional Baukau husi Postu Administrativu Baukau Vila, Baguia, Laga, Kelikai, Matebian, Vemasi no Venilale.
(tom)
