DILI, STLTIMORLESTE.com – Jesus mak naroman sei halakon nakukun, tanba nee fiar iha Jesus sei fo dalan moris rohan laek ba ema nia moris loron ba loron nia.
Kestaun nee hatoo husi Padre Richardo Pasang SVD ba STL liu husi nia refleksaun loron Tersa (24/03/2026) hatete, Jesus mak naroman hodi halakon nakukun, tanba nee fiar iha Jesus.
Padre dehan, devosaun ohin nian, bazeia ba leitura Evanjelhu João 8:21-30 no Numeros 21:4-9, konvida ema atu reflete konaba fiar no konfiansa iha Jesus.
“Fiar fo diresaun ba moris Jesus mai nuudar naroman ida neebe halakon nakukun, maibe ema barak la simu nia. Sira haree Jesus nuudar ema baibain deit, laos nuudar Maromak nia Oan-Mane neebe haruka atu salva mundu. Fiar iha jesus fo diresaun ba ita-nia moris, hodi fo hatene katak moris nee lori ita ba moris rohan laek,” dehan Padre Richardo.
Padre dehan, barani atu Fiar Jesus sublina katak Nia laos mundu nee nian, maibe mai husi leten, husi Aman iha lalehan. Nia dehan “Imi husi kraik, hau husi leten. Imi mundu nee nian, hau laos mundu nee nian (João 8:23). Ida nee maka deklarasaun forte ida kona-ba ninia divindade. Maibee, ema barak la kompriende saida mak Nia hakarak dehan, maski Nia koalia kona ba Nia mate no moris hias,” dehan Padre.
Hateke ba Kristu nia Krus Iha Numeros 21:4-9, ema haree katak samea bronze nee mak sinal ida hosi Maromak nia prezensa neebe kastigu no salva. Nunee mos, Jesus nia sae aan iha Kruz nuudar sinal salvação ba Nia seguidor sira. Hateke ba Kristu nia krus no lori ema nia krus loron ba loron tuir Nia, nee mak dalan moris nian neebe tenke foti nuudar sarani fiar nain.
“Orasaun Devosional Nai Jesus, Ita-boot mai husi Aman atu salva mundu. Dala barak hau konese Ita boot ho superfisial deit. Hau fiar, mais hau kaan fiar sei fraku. Loke hau nia fuan atu hau bele fiar duni iha Ita Boot. Tulun hau atu abandona sala no lao iha Ita-nia domin nia naroman. Atu hau nia moris reflete liutan hau nia fiar iha Ita-boot. Amen,” dehan Padre.
Iha biban nee bibi atan Kreda Katolika nee husu ema hotu nafatin tau komfiansa no fiar iha Kristu tanba Nia mak Dala Naromak hodi halakon Nakukun.
(eme)
