BAUKAU, STLTIMORLESTE.com – Diretor Jeral Servisu Rejistu Notariadu, Agostinho Gonçalves Viera husu Autoridade Suku sira iha Munisipiu Baukau atu koopera rejistu dadus mortalidade.
Nia esplika, Diresaun Servisu Rejistrasaun Notariadu mak responsabiliza ba rejistu dadus sertidaun nasimentu, obitu, sertidaun kazamentu inklui mos rikusoin sira, tanba nee liu husi sosializasaun neebe inisia husi Ministeriu Saude no World Health Organization kona-ba rejistu dadus mortalidade presiza tebes kolaborasaun husi Autoridade Suku sira atu fornese dadus ho loos no klaru ba sidadaun matebian ida nia identidade.
“Husi workshop ida nee ita hotu atu servisu hamutuk liu-liu Xefe Suku, Xefe Aldeia sira, sira mak hatene liu se mak mate se mak moris, tanba problema barak mak mosu liu-liu Autoridade Suku sira laiha seriedade, tanba nee tenke servisu hamutuk fo informasaun neebe loos,” Diretor Jeral Servisu Rejistu Notariadu Agostinho Gonçalves Viera hateten hafoin partisipa sosializasaun rejistu dadus mortalidade iha salaun apuramentu Vila Nova Baukau, Kinta (26/03/2026).
Nia sublina, presiza Autoridade Suku fornese dadus mortalidade nian klaru ba Ministeriu Saude no Ministeriu Justisa, tanba antes nee akontese iha Autoridade Suku balu fasilita sidadaun balu neebe sei moris ba trata sertidaun obitu asesu pensaun veteranus hafoin detekta husi notariadu.
Maibe iha faze ida nee presiza Autoridade Suku sira nian seriedade no esplikasaun klaru dadus mortalidade husi sidadaun matebian ida ba sistema notariadu, tanba Diresaun Servisu Rejistrasaun Notariadu mak Diresaun ida neebe rejistu dadus klaru no loos ba sidadaun ida iha sistema nasional.
“Ami rejistu notariadu nee iha konservador sira atu rejistu faktu hotu neebe akontese ba ema ida nia moris no mate, mate tanba saida, ita iha hotu ona, presiza ita nia servisu hamutuk deit, liu liu kejujuran,” Agostinho sujere.
Iha fatin hanesan, Xefe Suku Afasa, Joaquim Fernandes Ximenes kompromete, sei koopera ho metodu neebe Ministeriu Saude no World Health Organization estabelese bainhira iha ona data fiksu atu hahu no konsidera, rejistu numeru mortalidade iha suku importansia neebe sei rekolha dadus no lista husi baze, maibe rekomenda tenki defini tempu implementasaun, tanba durante nee Autoridade Suku rejistu taxa mortalidade bazeia fixa familia husi iha tinan 2011 too 2024 antes reverifika hikas iha tinan 2025.
“Ami mos koopera, maibe presiza iha informasaun klaru atu implementa tuir buat neebe Governu Sentral, tanba nee prezisa iha orientasaun klaru mak ami lao tuir,” Joaquim espresa.
(tom)
