DILI, STLTIMORLESTE.com – Freedom Faithnet Global (FFG) Timor Leste neebe lidera husi Maria Carlos (Mami) servisu hamutuk ho Cruz Vermelha Timor Leste (CVTL) no Banco de Sangue Hospital Nasional Guido Valadares (HNGV) Dili, realiza asaun doasaun raan hodi ajuda ema seluk neebe presiza raan.
Atividade asaun doasaun raan neebe mobiliza ema nain atus ida resin husi nasaun Timor Leste no Indonezia halao iha Timor Plaza, Dili, Sabadu (28/3/2026).
Embaixador Indonezia ba Timor Leste, Okto Dorinus Manik ho nia espoza, Flantina Sari Mutiara Silalahi partisipa iha atividade asaun doasaun raan nee. Prezenza Embaixador Okto Dorinus Manik iha atividade doasaun raan nee atu motiva sidadaun Indonezia, liu-liu funsionariu sira neebe servisu iha empreza estatal Indonezia nian atu voluntariumente fo sira nia raan ba ema neebe presiza raan.
“Ami kolabora ho doutor Timoroan sira hodi realiza atividade doasaun raan nee, tanba ema barak presiza tulun, liu-liu sira neebe moras no tratamentu sira nia saude iha ospital. Nesesidade ba raan fresku iha Timor Leste aas tebes no to’o ohin loron fornesimentu raan seidauk bele responde hotu ema barak neebe presiza raan,” katak Embaixador Okto Manik.
Nia dehan, raan turuk ida bele salva maun alin sira nia vida. Tanba nee, atividade doasaun raan nee halao dala tolu iha tinan ida nia laran. Ida nee sai bensaun ba sira neebe presiza no sira neebe moras.
“Ita la hatene ita nia raan nee fo ba se no ema neebe simu raan nee mos la hatene raan nee mai husi se. Maibe, benefisiu ba sira neebe oferese sira nia raan ba ema neebe presiza, sira hetan raan foun fali hafoin hamoos ida nee,” tenik Embaixador Okto Manik.
Nia hato’o agradese ba doador sira neebe voluntariamente fo sira nia raan iha atividade doasaun raan nee, neebe mai husi empreza Estatal Indonezia nian hanesan, Banku Mandiri, BRI, Telkomcel no empreza privadu husi Indonezia.
“Ida nee hanesan aktividade humanitaria ida atu fahe ba maluk sira neebe presiza tulun husi ita,” dehan Okto Manik.
Embaixador Okto Dorinus Manik dehan, ninia prezensa iha atividade doasaun raan nee dala ikus ona tanba nia husik ona Timor Leste iha loron 1 Abril 2026, tanba nia mandatu hotu ona.
Nunee mos Koordenador FFG iha Timor Leste, Maria Carlos ba STL hatete katak FFG hamutuk ho CVTL no Banco de Sangue HNGV Dili realiza asaun doasaun raan ba dahuluk iha tinan 2026.
“Atividade asaun doasaun raan neebe ami realiza ohin loron nee hanesan atividade umanitaria neebe ami halo ba dahuluk iha tinan ida nee nia laran. Atividade dosaun raan nee ami halo dala tolu iha tinan ida nia laran no ema barak mak voluntariumente oferese sira nia ran ba ema neebe presiza raan, tanba raan turuk ida bele salva ema nia vida,” tenik Maria Carlos.
Nia dehan, ema neebe voluntariamente oferese nia ran liuhosi asaun doasaun raan nee la hatene nia raan nee ba se, maibe raan turuk ida ajuda salva ema seluk nia moris. Nunee mos raan sira neebe kolleta husi mobilizasaun FFG servisu hamutuk ho CVTL no Banco de Sangue HNGV Dili nee, bele ajuda fali mos doador sira nia familia. Tanba nee, nia husu ba ema hotu atu halo doasaun raan voluntariamente hodi bele ajuda ka salva ema seluk nia vida iha ospital.
Maria Carlos dehan, atividade asaun doasaun raan nee hetan apoiu husi CVTL, Banco de Sangue HNGV Dili, Pertamina Internasional Timor, Banku Mandiri, Timor Plaza, FFG, Sylvia Dili, GBI Rock, Caravelha, Jatim Food, Cini Farmacia, ANL, Moris Living Water, Bintang Fajar, Lda, Carya Timor Leste, Lda, Lidwi, BRI, Telkomcel, Cruz Vermelha Timor Leste, KBRI Dili, WHO no sel-seluk tan.
Iha fatin hanesan, Padre (Pe) Fausto Tilman de Araujo, O.Carm, hatete nia apresia tebes atividade doasaun raan nee, tanba ho raan turuk ida bele salva ema nia moris. Nia espera atividade umanitaria hanesan nee tenke halao bei-beik, tanba ema barak mak presiza tulun husi maluk sira neebe ho voluntariamente fo tulun ba maluk sira neebe presiza.
“Doasaun raan nee importante ba ita hotu atu salva ema nia vida. Ema neebe moras presiza raan bele hetan lalais, tanba raan nee fo moris ba maluk sira neebe iha emerjensia presiza ran. Ida nee signifika katak ita tulun ona ninia moris,” dehan Pe. Fausto Araujo.
Iha sorin seluk, Alexandrina Martins husi FFG hatete atividade doasaun raan nee importante tebes, tanba liuhusi doasaun raan bele ajuda maluk sira neebé presiza raan. Nia dehan, objetivu doasaun raan nee mos bele hametin lasu sira maun-alin nian no parentesku nian hodi fó ho ksolok no domin.
Nunee mos Xefe Departamentu Banco de Sangue, dr. Alex Mendonca hatete atu responde ba preokupasaun kona-ba raan, husi sira nia parte halo ligasaun ho grupu oi-oin halo atividade asaun doasaun raan kada fulan 3 ka 4 dala ida.
“Husi ami nia servisu kolleta raan liuhosi doasaun raan hanesan nee, estoke raan limitadu liu mak typu raan AB, tanba ba typu raan ida nee ema limitadu liu,” dehan nia.
Objetivu hosi doasaun ran ne’e atu ajuda komunidade ne’ebé presiza ran, tanba liuhusi ran turuk ida bele ajuda no salva ema ida no doasaun raan ne’e nakloke ba komunidade ne’ebé hakarak bele hakbesik hodi oferese turuk ida.
Nia mos dehan, asaun ida ne’e pozitivu tebes tanba bele ajuda pasiente ne’ebé presiza iha ospitál nasionál.
(mik)
