DILI, STLTIMORLESTE.com – Ohin tama ona ba semana santa, husu ema hotu nafatin Fiel ba Maromak nunee nafatin metin ho Maromak.
Lia hirak nee hatoo husi Padre Richardo Pasang SVD liu husi nia refleksaun ba loron Segunda (30/03/2026) kona-ba domin no sakrifisiu.
“Domin no sakrifisiu, loron ida nee ita tama ona semana Santa ho leitura Profeta Isaias: 42: 1 – 7 no Saun Joaun 12 : 1 – 11. Iha Primeira leitura, Isaias hatoo mai ita kona ba atan Maromak nian neebe la hakilar ou hasai lian iha estrada maibe fiel atu hatudu Lei Maromak nian ba nasaun sira hotu tan Maromak nia Lei guia Ita atu moris Tuir Maromak nia hakarak. Lei Maromak nian halo ita metin iha Nia no nakfilak ita an husi sala sira neebe ita halo,” dehan Padre Richardo.
Padre hatete iha evanjelho ohin loron koalia konaba domin husi Feto Maria Magdalena neebe hatudu nia domin ba Jesus liu husi kose Mina ba Jesus nia ain, ida nee hanorin ema oinsa hatudu domin mos ba jesus iha semana santa nee.
“Iha Evanjelhu loron ohin, Saun Joaun hatudu mai ita asaun domin Maria Magdalena neebe barani kose Jesus nia ain ho Mina narwastu neebe karun hodi hatudu nia domin no dedikasaun tomak ba Jesus Kristu,” dehan Padre.
Padre dehan asaun Maria Magdalena nian konstras tebes ho Judas Iscariotes neebe kritika Maria tanba hasai osan barak.
“Ba Judas Iscariotes nusa kose Jesus nia ain ho Mina neebe karun? Maibe, ba Maria importante tebes oferese buat neebe diak ba Maromak. Keta oferese buat neebe restu ba Maromak. 10 sen, kuarter, 50 sen, 1 dolar karik Osan restu wainhira ita kompras iha merkadu. Dala ruma Ita fo buat hirak nee ba Maromak ho rasaun katak mak nee Ona. Maibe depois misa, sosa tua 20 dolar hodi enjoy life iha uma oin,” dehan Padre.
Bibi atan kreda katolika husu sarani idak idak atu oferese aan iha semana santa nee ho laran tomak hodi hatudu domin ba Maromak.
“Mai iha Semana Santa nia laran, ho grasa Maromak nian, fanu ita hotu oferese Ita an tomak ba Maromak ho domin liu husi buat neebe Ita oferese iha misa laran ho konsensia tomak. Keta fo buat restu nian ba Maromak maibe fo buat neebe importante no karun Laos atu halo Maromak kontente maibe hatudu Ita nia domin, sakrificio no dedikasaun tomak ba Nia,” dehan Padre.
Padre dehan Keta halo hanesan Judas Iscariotes maibe sai hanesan Maria Magdalena, iha biban nee Padre harohan ba Maromak atu nain haraik bensaun ba ema idak idak nia moris tomak amen.
(eme)
