DILI, STLTIMORLESTE.com – Komandante Munisípiu Dili, Komisáriu Asisténte Polísia Orlando Gomes informa, Komando Munisípiu hetan ona orientasaun husi Komandante Jerál para bele koloka seguransa ba iha festa paskua ninian iha Kinta feira Santa, Sesta ho sabadu aleluia ho domingu resurreisaun.
“Komando Munisípiu Dili prepara tiha ona planu operasaun ba seguransa ba festa paskua ninian, agora iha planu operasaun ita koloka ita nia membru sira ba iha Igreja sira iha kapital Dili no mós kolokasaun ba seguransa neebe mak Igreja realiza prosesaun sira nee, atu nunee bele asegura prosesaun sira ne’e bele lao diak,” hatete Komandante Munisípiu Dili, Komisáriu Asisténte Polísia Orlando Gomes ba jornalista sira iha nia knaar fatin Komando PNTL Munisipiu Dili, Kinta (02/04/2026).
Tuir nia, agora iha Igreja sira kapitál Dili liu-liu iha parokia tuir planu operasaun neebe Komando PNTL Munisípiu Dili iha katak, koloka membru tranzitu sira liu-liu atu organiza transporte sira para labele iha engarrafamentu atu kareta sira hotu-hotu bele para ho diak.
“Planu ita preparadu ona, ita nia membru sira ita breafing sira para molok halao sira nia servisu iha terenu, sira hatene ona, tanba ne’e iha Komando Munisípiu Dili tinan tinan ita sempre halo planu ba seguransa ninian,” nia koalia.
Nia informa, planu operasaun ba paskua nee mos hetan apoiu husi Unidade Espesiál Polísi, Unidade Máritima no mós hetan apoiu parseiru Polisiamentu Komunitaria.
“Ita orienta ona ba iha Eskudra sira atu fó hatene OPS sira kordena ho prezidente KPK, membru sira tomak para fó apoiu seguransa iha tempu paskua ninian,” nia hatutan.
Orlando Gomes apela ba sarani sira, joven sira, komunidade sira iha Munisípiu Dili, ita prepara ita nian aan, la kleur ita tama ona ba paskua, presiza ita nia kolaborasaun, ita nia kontribuisaun atu nunee ita bele asegura seguransa iha semana santa bele lao diak.
“Liu-liu Komando Munisípiu Dili husu ba joven sira neebe mak dala ruma ho motorizada kalan ho grupu grupu ita husu para atu hapara, nunee tau atensaun diak ba loron semana santa ninian, nunee ita bele ultrapasa serimónia ho di’ak”, nia argumenta.
Komisáriu Asisténte Polísia Orlando Gomes husu hotu-hotu hamutuk nunee fo hanoin kontribui ba estabilidade iha kapitál Dili.
“Ita nia kapitál Dili laos polísia mesak deit, maibé husu ba povu, husu ba komunidade, husu ba joven sira atu servisu hamutuk ho Komando Munisípiu liu husi ita nia Eskudra sira, ita nia Ofisiál Polísia Suku sira para ita hotu-hotu tau atensaun ba seguransa iha kapital Dili bele lao diak, lao ho susesu”, nia fo hanoin.
Nia dehan, molok tama semana santa Komando Munisípiu Dili orienta ona ba Eskudra, Seksaun sira iha Komando Dili molok atu tama ba iha semana santa ka paskua ninian nafatin halo patrollamentu ho kareta, patrollamentu la’o ain ba iha bairu sira hodi halo prevensaun konflitu sira neebe mak mosu iha bairu bairu sira.
“Tanba dala ruma akompanha iha bairu bairu dala ruma mosu konflitu, tanba ne’e ita lansa ona ita nia intelenjensia sira, ita nia Ofisiál Polísia Suku sira mós ba ko’alia ho ita-nia komunidade sira iha bairu sira no ita nia patrollamentu sira mós la’o nafatin para bele minimiza problema iha bairu sira”, nia koalia.
Nunee mos Koamandante UEP, Superintendente Xefe Polísia Damiao Correia hatoo kona-ba seguransa ba paskua nian nee normál, nee laos buat foun, tanba nee Unidade Espesiál sempre prontu apoia Komando Munisípiu Dili fo seguransa estabilidade liu-liu ba iha festa paskua nian ba iha teritóriu tomak, laos iha kapital Dili deit.
“Iha kompanhia neebe iha kolokasaun iha kompahia Branvo nee responsavel ba iha parte leste nian, kompanhia Delta responsalvél ba parte Oeste nian tantu REOA neebe iha kolokasaun permante iha neeba, ita prontu ona hodi garante seguransa estabilidade iha festa paskua”, nia afirma.
(eme)
