DILI, STLTIMORLESTE.com – Sarani iha area Perumnas, Bairo Pite, Dili, simu naroman Paskal ho ksolok no laran metin liu husi Misa Vijilia Paskal neebe halao iha Sabadu kalan nee. Ritual sunu lilin neebe foti husi lilin Paskal sai hanesan momentu sentral, neebe marka vitoria Kristu nian hasoru nakukun no mate.
Selebrasaun neebe hahu iha tuku 20:00 OTL nee marka ho ritual bensaun ahi matan, neebe halao iha nakukun laran iha Kapela oin. Bainhira Amu Selebrante foti lilin Paskal hodi proklama ka haklaken naroman Kristu nian, sarani sira mos hahu sunu sira nia lilin husi lilin boot nee. Iha minutu balu nia laran kapela Rainha da Paz neebe uluk nakukun transforma sai nabilan no naroman lilin nian, neebe habelar husi sarani ida ba maluk seluk.
Iha Liturjia lia fuan nian, sarani sira rona ho disiplina leitura hitu (7) husi testamentu antigu neebe haktuir istoria salvasaun nian, hahu husi krisaun mundu too promesa Maromak nian ba ninia povu ka emar. Lee leitura hitu nee sai hanesan baze hodi prepara sarani sira nia fuan atu simu ksolok moris hias nian.
Momentu neebe sarani sira hein liu mak, bainhira kantiku Aleluia resu ka haksolok fali iha kapela laran. Hafoin tempu kuarezma neebe nonok husi kanteiru ksolok nian, iha kalan nee grupu koral Perumnas kanta ho lian neebe aas no solene hodi fo sai kanta moris hias nian.
“Aleluia, Aleluia, Aleluia,” neebe kanta husi sarani hotu ho ksolok, kria ambiente espiritual neebe klean, hodi hatudu katak ksolok Paskal nian suli duni ona iha sarani sira nia let.
Aleinde naroman ho kantiku Aleluia ritual importa seluk iha kalan bensaun bee batizmu. Amu Selebrante fo bensaun ba bee neebe tau iha vaza ka bidon laran, hodi fo hanoin fali ba sarani sira kona-ba sira nia batizmu rasik. Hafoin bensaun nee sarani sira hamriik ho lilin lakan iha liman hodi renova fali sira nia votu batizmu, promesa atu moris fali nuudar ema foun neebe ses husi salan.
Selebrasaun kontinua liturjia Eukaristia neebe sai sentru husi fiar Katolika. Iha momentu komuniaun sarani sira hamriik ho haksolok no disiplina hodi simu Nai nia isin no ran, nuudar kbiit foun hodi moris tuir Kristu neebe moris hias ona.
Iha Omilia Amu Selebrante, Daniel fo hanoin katak, naroman neebe lakan iha liman tenke lakan mos iha fuan. ”Paskal mak tempu atu ita husik hela nakukun odi nian no moris fali iha naroman domin nian. Mai ita sai sasin ba Kristu neebe moris hias ona liu husi ita nia hahalok diak ba maluk sira,” dehan Amu Selebrante, Daniel bainhira prezide misa Vijilia Paskal, iha Kapela Rainha da Paz, Perumnas, Bairo Pite, Dili, Sabadu (04/04/2026).
Maski sarani sira nakonu too liur, selebrasaun nee lao ho disiplina no hakmatek. Tanba Autoridade lokal ho foinsae voluntariu sira servisu makaas, hodi jere tranzitu no parkeamentu iha area Perumnas nian, nunee la hamosu engarrafamentu.
Enkuantu misa neebe halao kuaze oras tolu nee remata ho bensaun solene, no sarani sira fila ba uma ida idak ho esperansa foun, hodi hein loron Paskal neebe sei kontinua dader fali.
(car)
