DILI, STLTIMORLESTE.com – Pasiente neebe hetan kanek iha kazu tentativu omisidiu agravadu neebe akontese iha loron Segunda (06/04/2026), maizumenus tuku 15:00 resin OTL, iha Aldeia Naroman, Suku Madohi, Postu Administrativu Dom Aleixo, evakua kedas mai Sentru Saude Komoro, sira neebe hetan kanek kontinua mai halo kurativu.
Tuir informasaun neebe diariu nee asesu husi pesoal saude iha sentru nee hatete, horiseik pasiente ho familia fila hikas bá sira nia uma, no ohin sira mai hodi kontinua halo kurativu bá kanek neebe iha. Pasiente la baixa iha hospital, sira halo kurativu hotu fila uma.
“Pasiente neebe hetan kanek iha parte kotuk, tanba sona husi sidadaun neebe moras mental nee fila tiha uma ona. Ohin sira mai kurativu fali,” dehan nia ba STL iha Sentru Saude Komoro, Tersa (07/04/2024).
Nia hatutan, sira la baixa iha hospital, depois kurativu sira fila bá uma.
Iha fatin hanesan, bainhira STL atu halo konfirmasaun ho Xefe Sentru Saude refere, maibe laiha fatin.
Sidadaun Marcia Barbosa dehan, ho kazu neebe akontese nee hanesan lisaun ida hodi fo hanoin ba familia sira atu tau matan bá oan kiik sira, labele husik sira sai mesak bá halimar iha liur ka vizinhu. Bainhira sira sai bá halimar iha liur familia ka inan aman tenke akompanha no haree tutuir sira. Nunee mos bá familia sira neebe iha membru familia neebe moras mental atu kuidadu nia iha uma deit, labele husik nia lao bá mai. Bainhira nia moras nee makaas lori kedas bá Hospital Nasional hodi hetan asistensia mediku para baixa ka sona aimoruk ruma, nunee nia bele hakmatek.
Nia katak, familia no inan aman sira labele husik oan kiik sira lao bá mai mesak-mesak, no hanorin oan sira bainhira sai husi uma tenke fo hatene, labele hatoman sai subar ka nonok. Kuandu husik sira toman sai nonok, akontese buat ruma inan aman rona mos ikus ona, atu koalia tan saida. Neebe diak liu mak familia, Inan aman sira tenke kuidadu oan sira, halo sira halimar deit iha uma laran.
“Haree bá kazu nee halo ita triste tebes, maibe atu koalia tan saida buat hotu akontese tiha ona. Buat neebe importante mak familia liu-liu inan aman tenke kuidadu oan kiik oan sira iha uma laran, labele husik sira sai bá halimar iha liur. Nunee mos bá familia neebe iha membru ruma sofre moras mental, atu kuidadu nia iha uma laran hodi evita atu labele akontese tan kazu hanesan nee. Bainhira haree moras nee sae makas, lori kedas nia bá ospital para mediku sira fo asistensia ba nia, labele husik nia sai ba estrada,” dehan nia.
Kazu tentativa omesidiu agravadu ho arma branka nee akontese iha Aldeia Naroman, Suku Madohi, Posto Administrativu Dom Aleixo, tuku 15:59 OTL, rezulta vítima nain (4), inklui ema ida neebe mate kedas iha fatin no nain tolu seluk hetan kanek.
(dom)
