DILI, STLTIMORLESTE.com – Arsebispu Arkedioseze Metropolitana Dili, Dom Virgilio Cardeal do Carmo da Silva, SDB husu ema hotu hapara krime soe bebe no violensia hasoru feto, tanba ida nee kultura neebe kontra dalan mate hanesan sala mortal.
Bibi atan uma kreda husu ba inan-aman eduka oan sira, tanba kultura kontra dalan mate nian mak violensia no abortu, tanba nee iha tempu paskua nia nee ho Jesus moris hakarak fo hanoin nafatin ba sarani hotu-hotu atu iha domin ida nee ba vida.
“Moris nee Maromak mak fo, tanba nee laiha ema ida iha kompetensia atu hasai ema ida nia vida, vida nee Maromak mak fo liu husi domin, nunee laiha autoridade ka ema ida atu hasai ema seluk nia moris,” Arsebispu Arkidioseze Metropolitana Dili, Dom Virgilio Cardeal do Carmo da Silva, SDB ba jornalista sira hafoin hatoo mensajem Paskua ba sarani sira iha Arkidioseze Lecidere, Dili, Kuarta (1/4/2026).
Dom Virgilio haforsa liu tan, laiha ema ida iha kompetensia atu hasai ema ida nia vida, liu-liu bebe neebe inosente inan soe no abandona sira atu moris haree mundu nia furak, maibe inan hili dalan hakotu nia vida nee sala moral, basa vida nee Maromak mak fo liu husi domin, atu ema moris bele iha.
Tan nee hakarak atu fo hanoin ba sarani sira, hola nafatin konsiensia ida nee atu la hadaet hahalok hirak nee iha TL, oinsa nuudar sarani fiar metin nafatin atu labele monu iha tentasaun sira.
“Maromak kria ita hotu hanesan feto no mane ho dignidade neebe hanesan Maromak oan, ilas Maromak nian, maibe ita ema nia intinasaun, ema nia emosaun too haluha hod halo violensia, ema halo violensia hafoin aerepende,” dehan Dom Virgilio.
Bibi atan uma kreda husu ba inan-aman sira atu fo nafatin korajen oan sira, liu-liu iha momentu difisil sira nee oinsa atu hatudu dalan neebe los ba oan sira hodi foti nia dilema sira neebe hasoru.
Tanba nee, paskua konvida ema idak-idak fila prinsipiu sarani nia, hadomi respeita hahú familia, tanba familia sai knuk neebe hanorin atu respeita no hadomi malu.
Maibe buka atu hamate kultura abortu ninian iha rai doben Timor Leste, tanba povu maioria sarani katolika.
Tanba nee, Conferensia Episcopal Timorense (CET) liu husi Komisaun Nasional Edukasaun Katoliku Timor Leste (KONEKTIL), lori materia Relijiaun moral ba ema eskola hotu-hotu oinsa hanorin sira.
Nunee iha Dioseze tolu iha maneira rasik atu halo, partikularmente iha Dioseze Dili iha ekipa familia ninian tama sai eskola, ekipa hanorin sira misaun oinsa atu promove ajuda joven sira bele komprende didiak liu tan kona-ba hadomi vida laos uza artefisiail ba abortu nia, maibe liu husi buat neebe natural.
Tanba iha Dioseze Dili ekipa tama sai eskola sira halo saida, hanorin foin sae sira atu konhese sira nia aan, konhese sira nia moris nuudar feto mane, tanba hirak nee dalan atu ajuda sarani bele iha responsabilidade ba iha ita, nuudar prezente neebe Nai Maromak fo.
(joa)
