BAUKAU, STLTIMORLESTE.com – Ministeriu Publiku (MP) fo karta notifikasaun ba Xefe Suku Afasa, Joaquim Fernandes Ximenes inklui komunidade nain rua (2) atu sai testamunha ba projetu reabilitasaun estrada rural, husi area Loibalari ba Budefu iha Aldeia Uligata, Suku Afasa, Postu Administrativu Kelikai Antigu, Munisipiu Baukau.
Tuir nota informativu neebe STL asesu iha loron 02 Abril, Ministeiru Publiku fo karta mandadu notifikasaun ba Xefe Suku Afasa inklui komunidade nain rua katak, Prokurador Republika titular inkeritu ho NUC 0019/26 PGGCC-Seksaun GCCCCO katak, ofisial Justisa haruka notifikasaun haktuir artigu 92°. n.1-primeira parte husi K.P.P orienta Xefe Suku Afasa Joaquim Fernandes Ximenes inklui komunidade nain 2 hanesan Carlos Filipe Ximenes no Eurico X. F. Belo atu marka prezensa iha Gabinete Sentral Kombate Korupsaun no Kriminalidade Organizada iha loron 10 Abril tinan nee hodi halo inkrisaun ba sira nuudar testamunha iha ambitu inkeritu ba projetu reabilitasaun estrada rural husi area Loibalari-Budefu iha Aldeia Uligata, Afasa.
“Ida nee ami hanesan testamunha, sira mai aprosimasaun para ami atu deklara ba Tribunal katak estrada neebe halo liu husi orsamentu PNDS nee liu husi prosesu legal ga lae, iha relatoriu ga lae, nee mak Tribunal husu ami atu halo klarifikasaun,” hateten Xefe Suku Afasa Joaquim Fernandes Ximenes ba jornalista sira iha Vila Nova Baukau, Tersa (07/04/2026).
Husi karta notifikasaun nee, Carlos Filipe Ximenes nuudar porta voz neebe realiza konferensia imprensa iha loron 29 Dezembru 2025 deklara katak, implementa projetu reabilitasaun estrada rural nee liu husi PNDS tinan 2023, neebe Ministeriu Administrasaun Estatal preve orsamentu ba Suku Afasa hamutuk US$ 28.000.00 ho tipu cor sementi ba medida metru 600 ho durasaun fulan 3 neebe tuir data neebe iha atu termina iha tinan 2023 liu ba, maibe projetu refere katak la finaliza no sementi saku 50 no material seluk rai henek hetan estragus deskonfia hamosu korupsaun no Eurico X. F. Belo nuudar komunidade neebe mos ejize projetu PNDS refere.
Atu informa mos, hafoin konferensia imprensa nee realiza iha loron 29 Dezembru 2025, inisiu tinan nee ekipa ida husi Ministeriu Administrasaun Estatal mos too ona iha Suku Afasa rekolha informasaun sira kona-ba implementasaun projetu refere.
(tom)
