DILI, STLTIMORLESTE.com – Jesus terus no mate iha kruz hodi kasu ema nia sala, ho Jesus nia moris hias lori mudansa ba ema nia moris.
Lia hirak nee hatoo husi Padre Richardo Pasang SVD ba STL liu husi nia refleksaun ba loron Tersa (07/04/2026) hatete, Jesus nia terus no mate iha Kruz hodi kazu ema hotu nia sala, no Husi nia moris Hias husi mate lori esperansa ba ema.
Padre dehan Devosaun Loron-Loron: Tersa-Feira, 7 Abril 2026, foti hosi Apostolu sira-nia hahalok 2:36-41 no João 20:11-18.
Padre dehan Jesus nia enkontru ho Maria Madalena iha rate jardín nian mak ezemplu ida kona-ba relasaun besik entre Jesus ho Ninia seguidor sira. Bainhira Jesus bolu Maria ho nia naran, nia rekonese kedas Nia no muda husi triste ba ksolok. Ida-nee hatudu katak Jesus konese ema pesoalmente no bolu ho domin.
“Jesus nia moris-hias lori mudansa boot ba ita-nia moris. Nia la prezente ona fizikamente, maibe liu husi Espíritu Santu, Nia kontinua serbisu iha ita-nia moris. Hanesan Maria Madalena, ita hetan bolu atu fo sasin kona-ba Ninia moris-hias no atu fahe lia-foun diak ba ema seluk,” dehan Padre.
Padre haktuir tan katak festa Paskua mak momentu ida neebe bolu ema hotu partisipa iha viajen misterioza Salvasaun Maromak ba nia ema.
“Esperiensia Paskua nian mak momentu ida iha-neebe ita esperiensia Maromak nia prezensa iha ita-nia laran, Momentu ida iha-neebe ita bolu ho naran atu partisipa iha viajen misterioza salvasaun Maromak nian ba ita hotu. Ita-boot sente ida-nee?,” dehan Padre.
Pergunta sira reflesaun nian, – Ita mos sente Jesus besik ita? Oinsa ita bele haklaken Ninia moris-hias iha moris loroloron nian?
Iha biban nee Bibi atan kreda Katolika nee harohan ba Jesus atu perdua sala hotu neebe ema halo hodi halo jesus Mate iha Kruz no moris hias lori esperansa ba ema ida- idak iha biban nee padre mos harohan ba Nain atu akompanha nafatin sarani idak idak iha moris loron loron.
“Orasaun Oh Nai, ami agradese tanba Ita-Boot hadomi no apresia ami-nia esforsu diak sira hodi arrepende no hakbesik ba Ita-Boot loron-loron. Mai ami kontinua hamutuk ho Ita-Boot, Ai-uvas, atu nunee ami bele fo fuan diak ba ema barak liutan. Amen,” hakotu nia.
Padre mos husu Sarani ida idak nafatin halo refleksaun ba aan hodi muda hahalok aat sira ba hahalok diak nunee moris tuir Jesus nia hanorin sira, hanesan mos uvas fuan diak bele fo fuan diak ba ema barak liu tan.
(eme)
